Jitendra Awhad Politics: नाशिकमध्ये निविदा भ्रष्टाचार; ‘पीडब्ल्यू़डी’चे अभियंते कमावतात खोऱ्याने पैसे?

Jitendra Awhad News: सिंहस्थ कुंभमेळ्यातील विकास कामे आणि निविदा यावरून वाद सुरू आहे. आता त्यात सार्वजनिक बांधकाम विभागाच्या निविदांचीही भर पडली आहे. त्या निविदांमध्ये भ्रष्टाचार झाल्याचा आरोप झाल्याने खळबळ उडाली आहे.

राष्ट्रवादी काँग्रेस शरदचंद्र पवार पक्षाचे नेते आमदार जितेंद्र आव्हाड यांनी प्रशासनावर गंभीर आरोप केले आहेत. नाशिकच्या सार्वजनिक बांधकाम विभागातील निविदांमध्ये भ्रष्टाचार सुरू आहे. याबाबत अनेक तक्रारी आल्या आहेत, असे ते म्हणाले.

मुख्यमंत्री देवेंद्र फडणवीस आणि जलसंपदा मंत्री गिरीश महाजन यांनी सिंहस्थ कुंभमेळ्याच्या कामात थेट लक्ष घातले आहे. अन्य पक्षांच्या लोकप्रतिनिधींना बैठकांनाही निमंत्रित केले जात नाही. त्याबाबत खासदार राजाभाऊ वाजे यांनी सरकारवर आरोप केले होते.

या पार्श्वभूमीवर आमदार जितेंद्र आव्हाड यांनी सार्वजनिक बांधकाम विभागाच्या कामकाजावर गंभीर प्रश्नचिन्ह उभे केले आहे. येथील अभियंता औटी यांच्या विरोधात थेट तक्रारी आहेत. अभियंता औटी हे फावडे घेऊनच बसले आहेत, असे आव्हाड म्हणाले.

नाशिकमध्ये मोठे कॉन्ट्रॅक्टर लहान कॉन्ट्रॅक्टरना दाबण्यासाठी गैरप्रकार करतात. मोठे कंत्राटदार टेंडर मॅनेज करण्यासाठी लहान कंत्राटदारांना उचलून आणि अगदी मारहाण करण्यापर्यंत जात आहेत याबाबत पोलिसांमध्ये तक्रार देखील झाली आहे. माझ्याकडे देखील एक तक्रार आहे.

गंभीर प्रकरण असूनही याबाबत कोणतीही कारवाई होत नसल्याचे माझ्यापर्यंत आले. सिंहस्थ कुंभमेळ्याचे काम सांगून अनेक गैरप्रकार सुरू आहेत. हा सर्व भक्तांचा पैसा लुबाडण्याचा प्रकार आहे. सरकारच्या पैशावर सर्रास दरोडा टाकला जात असताना शासन गप्प का?

निविदा मॅनेज करून सार्वजनिक बांधकाम विभाग भ्रष्टाचार करीत आहे. भ्रष्टाचार करणाऱ्या अधिकाऱ्यांची नावे देखील सगळ्यांना माहित आहेत. सिंहस्थ कुंभमेळा मंत्री गिरीश महाजन यांनी त्यात लक्ष घालून कारवाई करणे अपेक्षित आहे, अशी अपेक्षा आव्हाड यांनी व्यक्त केली.

-------