Kirit Somaiya Politics: किरीट सोमय्या यांनी पहलगाम दहशतवादी हल्ल्याचा संबंध मालेगावशी जोडला, काय आहे प्रकरण?

Kirit Somaiya News: भाजपचे नेते किरीट सोमय्या यांनी पुन्हा एकदा मालेगाव शहराला टार्गेट केले आहे. आता त्यांनी महापालिका आणि महसूल अधिकाऱ्यांना धारेवर धरले आहे. या अधिकाऱ्यांवर कारवाई करण्याच्या मागणीने चांगलीच खळबळ उडाली आहे

मालेगाव महापालिकेने कोणतेही अधिकृत कागदपत्र नसताना जन्मदाखले दिले आहेत. यामध्ये एक हजार ४४ जन्म दाखले संशयास्पद आहे. याप्रकरणी संबंधितांवर देशद्रोहाचा गुन्हा दाखल करावा अशी गंभीर मागणी त्यांनी केली आहे. किरीट सोमय्या यांच्या मागणीने मालेगाव शहरात आणि प्रशासनात तणावाचे वातावरण आहे.

माजी खासदार सोमय्या यांनी मालेगाव प्रकरणाचा संबंध थेट पहलगाम दहशतवादी हल्ल्याशी जोडण्याचा प्रयत्न एक हजार ४४ जन्म दाखले शासकीय यंत्रणेने दिले. यांच्या आधारे ४० जणांनी पासपोर्ट तयार केला. हे चाळीस जण आता देशाबाहेर पळून गेले आहेत, असा दावा सोमय्या यांनी केला आहे.

महापालिका आणि शासकीय यंत्रणांनी जन्मदाखले विलंबाने देण्याचे कोणतेही कारण नाही. या यंत्रणांनी मालेगाव शहरात बनावट कागदपत्रांच्या आणि कोणतेही वैध कागदपत्र नसताना जन्मदाखले दिले आहेत. या दाखल्यांचा मोठ्या प्रमाणावर गैरवापर होतो. पहलगाम सारख्या दहशतवादी घटना याच प्रकरणातून घडू शकतात. त्यामुळे हे प्रकरण गांभीर्याने घेण्याची आवश्यकता आहे.

यासंदर्भात मालेगाव महापालिकेच्या आयुक्तांना सक्तीचा राजावर पाठविण्यात यावे. दाखले देणाऱ्या अन्य कर्मचारी आणि अधिकाऱ्यांवर देखील देशद्रोहाचा गुन्हा दाखल करण्यात यावा. या संदर्भात आपण लवकरच मुख्यमंत्री देवेंद्र फडणवीस यांची भेट घेणार आहोत. हे प्रकरण गंभीर असल्याने प्रशासनाने तातडीने कारवाई करावी, अशी मागणी त्यांनी केली.

किरीट सोमय्या यांनी पोलीस अधीक्षक तेगबीरसिंग संधू, अप्पर जिल्हाधिकारी देवदत्त केकान, महापालिका आयुक्त रवींद्र जाधव, तहसीलदार सोनवणे यांसह विविध अधिकाऱ्यांची चर्चा केली. सोमय्या यांनी आता थेट महापालिका अधिकारी आणि कर्मचाऱ्यांनाच देशद्रोही संबोधल्याने या प्रकरणाचे गांभीर्य वाढले आहे.

भाजपचे नेते किरीट सोमय्या यांच्या या भूमिकेवर मालेगाव मध्ये तीव्र प्रतिक्रिया उमटल्या आहेत. किरीट सोमय्या यांच्या विरोधात आंदोलन देखील करण्यात आले. किरीट सोमय्या 'गो बॅक' अशा घोषणा देण्यात आल्या. शहराचे माजी आमदार असिफ शेख आणि अन्य पदाधिकाऱ्यांनी महापालिका आयुक्त यांची भेट घेऊन त्यांना पाठिंबा व्यक्त केला आहे. सोमय्या राजकीय स्वार्थासाठी खोटे आरोप आणि मालेगाव शहराला बदनाम करीत असल्याचा दावा या नेत्यांनी केला.

-----