NCP Sharad Pawar News: विधानसभा निवडणूक निकालानंतर जामनेर मतदारसंघात राजकीय वातावरण शांत होते. आता महाविकास आघाडीच्या नेत्यांत पुन्हा एकजुटीचे वारे वाहू लागले आहेत. या नेत्यांनी मंत्री गिरीश महाजन यांच्या बाबत प्रश्नचिन्ह उपस्थित केले आहे.
महाविकास आघाडीचे नेते आणि राष्ट्रवादी काँग्रेस शरदचंद्र पवार पक्षाचे दिलीप खोडपे यांसह विविध नेत्यांनी पत्रकार परिषद घेतली. जामनेर मतदार संघातील विविध प्रश्न गंभीर झाले आहेत. सत्ताधारी पक्ष मात्र सत्तेचा दुरुपयोग करण्यात व्यस्त आहे. त्यामुळे महाविकास आघाडीला पुढे यावे लागले.
यावेळी जिल्हा परिषदेचे माजी अध्यक्ष दिलीप खोडपे यांनी जामनेर तालुक्यातील पोलीस भाजपचे कार्यकर्ते असल्यासारखे काम करत असल्याचा गंभीर आरोप केला. जुने वाद उकरून काढून महाविकास आघाडीच्या नेत्यांविरोधात खोटे गुन्हे दाखल करण्याची मोहीम सुरू करण्यात आली आहे. त्याला भाजप नेत्यांचे प्रोत्साहन असल्याचा दावा त्यांनी केला.
यावेळी महाविकास आघाडीच्या विविध नेत्यांनी जलसंपदा मंत्री गिरीश महाजन यांना आवाहन केले. गिरीश महाजन यांनी राजधर्म पाळावा. शत्रुत्व म्हणून महाविकास आघाडीच्या नेत्यांविरोधात खोटे गुन्हे दाखल करणे आणि त्यांच्या मागे पोलिसांचा ससेमीरा लावणे हे तातडीने थांबवावे.
मंत्री महाजन यांनी खऱ्या गुन्हेगारांना कडक शासन करावे. याबाबत कोणालाही सोडू नये. मात्र राजकीय शत्रू म्हणून महाविकास आघाडीच्या नेत्यांविरोधात कारवाई करणे योग्य नाही. हे प्रकार मंत्र्यांनी तातडीने थांबवावे असे आवाहन त्यांनी केले
श्रीरामपूर (जामनेर) येथील माजी नगराध्यक्ष पारस ललवाणी आणि काँग्रेसचे माजी तालुकाध्यक्ष शंकर राजपूत यांच्याबाबत पोलिसांनी सुडाचे राजकारण केले आहे. जुना वाद उकरून काढून त्यांच्याविरोधात गुन्हा दाखल केला आहे. जामनेर ची सबंध पोलीस यंत्रणा या दोन नेत्यांच्या मागे लागली आहे. हे कोणी गुन्हेगार नसून राजकीय आणि सामाजिक कार्यकर्ते आहे याचे भान पोलिसांनी ठेवावे, असे श्री. खोडपे म्हणाले.
यावेळी राष्ट्रवादी काँग्रेस शरदचंद्र पवार पक्षाचे तालुका अध्यक्ष किशोर पाटील, दीपक राजपूत, संजय राठोड, संदीप पाटील, काँग्रेसचे नेते एसटी पाटील प्रल्हाद बोरसे आदी नेत्यांनीही विविध तक्रारी मांडल्या. महायुतीच्या सरकारमध्ये जामनेरचे सारे प्रशासन एका पक्षाची राजकीय शाखा असल्यासारखे वर्तन करीत असल्याची गंभीर तक्रार या नेत्यांनी केली.
-----
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.