Girish Mahajan Politics : दादा भुसेंच्या सुसाट राजकारणाला गिरीश महाजनांनी लावला ब्रेक, दुसरा कट्टर विरोधकही भाजपमध्ये घेतला

Nashik Politics : भाजपचे संकटमोचक अशी ओळख असलेले मंत्री गिरीश महाजन यांनी नाशिकच्या राजकारणात चांगलाच रस घेतला आहे. नाशिक शहरापाठोपाठ ग्रामीण राजकारणातही त्यांनी बऱ्यापैकी शिरकाव केला असून विरोधी पक्षातले मोठ-मोठे मासे गळाला लावत ते भाजपची ताकद वाढवत आहेत. पण मालेगावात त्यांनी एकनाथ शिंदेंच्या लाडक्या शिलेदाराला अडचणीत आणलं आहे.

गिरीश महाजनांनी आता शिवसेना शिंदे पक्षाचे मंत्री दादा भुसे यांची मोठी कोंडी केली आहे. मालेगाव बाह्य मतदारसंघ हा भुसेंचा बालेकिल्ला आहे. पण या मतदारसंघातले दादा भुसे यांचे दोन्ही कट्टर विरोधक गिरीश महाजनांनी क्रमाक्रमाने गळाला लावले आहेत. दादा भुसेंच्या विरोधात विधानसभा निवडणूक लढवलेल्या दोन्ही उमेदवारांना अखेर भाजपने पक्ष प्रवेश दिला आहे.

काही दिवसांपूर्वी, शिवसेना उद्धव बाळासाहेब ठाकरे पक्षाचे उपनेते अद्वय हिरे यांनी भाजपमध्ये प्रवेश केला होता. त्यानंतर आता दादा भुसे यांचे दुसरे कट्टर विरोधक असलेले बंडू काक बच्छाव यांचाही भाजपप्रवेश झाला आहे. बंडूकाका बच्छाव बारा बलुतेदार मित्रमंडळाचे संस्थापक असून शुक्रवारी (ता. २८) समर्थकांसह त्यांनी भारतीय जनता पक्षात प्रवेश केला. जलसंपदामंत्री गिरीश महाजन यांच्या उपस्थितीतमालेगावात मोठ्या थाटामात त्यांचा प्रवेश सोहळा झाला.

गेल्या विधानसभा निवडणुकीत अपक्ष म्हणून निवडणूक लढविलेल्या बंडूकाकांनी दादा भुसेंना जबरदस्त लढत देत दुसऱ्या क्रमांकाची मते मिळवली होती. तर अद्वय हिरे हे शिवसेना ठाकरे गटाकडून निवडणूक लढले होते. त्यांनाही तिसऱ्या क्रमांकाची मते मिळाली होती. दोघेही दादा भुसे यांचे कट्टर विरोधक असून ते आता भाजपवासी झाले आहेत. दोघांना गळाला लावून मंत्री गिरीश महाजन यांनी दादा भुसे यांच्या सुसाट राजकारणाला ब्रेक लावण्याचा प्रयत्न केल्याचे बोलले जात आहे.

महाजन-भुसे संघर्षाचा नवा अध्याय यातून सुरु झाल्याचे दिसते आहे. भुसे यांची राजकीय कोंडी करण्याच्या उद्देशाने मंत्री महाजन यांनी त्यांचे दोन्ही विरोधक आपल्या पक्षात घेतले आहे. नाशिकच्या पालकमंत्रीपदावर प्रभाव मिळविण्यासाठी महाजन- भुसे यांच्यात सुरुवातीपासून स्पर्धा आहे. पालकमंत्री पदावर भुसे आग्रही होते त्यातून वाद उफाळला म्हणून गिरीश महाजनांचे घोषित झालेले पालकमंत्री पद रद्द झाले होते. आता नगरपालिका निवडणूकीच्या काळाच पुन्हा दोघांमधील संघर्ष उफाळला आहे.