Malegaon Mayor Politics: इस्लाम पक्षाची मोठी खेळी; काँग्रेस, ‘एमआयएम’ला झुलवणार आणि दादा भुसेंना जवळ करणार?

Dada Bhuse News: मालेगाव महापालिका निवडणुकीच्या निकालानंतर शहरात राजकारण तापले आहे. शिक्षण मंत्री दादा भुसे आणि माजी आमदार असिफ शेख त्याचे केंद्र आहे. या माध्यमातून मोठी खेळी खेळण्याचा इस्लाम पक्षाचा प्रयत्न आहे.

मालेगाव महापौर पदाच्या निवडणुकीसाठी इस्लाम पक्षाचे माजी आमदार आसिफ शेख यांनी मोठी खेळी खेळण्याची तयारी केली आहे. त्यामुळे राज्यातील वेगळा प्रयोग होण्याची चर्चा आहे. यामध्ये शिक्षण मंत्री दादा भुसे यांच्या निर्णयाकडे सगळ्यांचे लक्ष लागले आहे.

मालेगाव महापालिकेत शेख यांच्या इस्लाम पक्षाला ३५ आणि सहकारी समाजवादी पक्षाला पाच जागा मिळाल्या आहेत. त्यामुळे महापौर पदासाठी संख्याबळाची बेगमी आधीच पूर्ण झाली आहे. मात्र ‘एमआयएम’ पक्षाचे आमदार मौलाना मुफ्ती यांना खिंडीत गाठण्यासाठी सर्व तयारी केली जात आहे, असे सूत्रांनी सांगितले.

गेल्या पाच वर्षात मालेगाव महापालिकेत माजी आमदार आसिफ शेख आणि त्यांच्या मातोश्री महापौर होत्या. उपमहापौरपदी दादा भुसे यांचे अनुयायी आणि शिवसेनेचे नगरसेवक राहील. त्यामुळे या दोन्ही पक्षांमध्ये चांगली राजकीय ट्युनिंग आहे.

हिंदुत्वाची भूमिका घेऊन मूळ शिवसेना उद्धव ठाकरे पक्षाला सोडचिठ्ठी एकनाथ शिंदे यांनी दिली. मात्र फोडाफोडीच्या राजकारणात विशेष रस असलेल्या या पक्षाने मालेगाव मध्ये वेगळीच चाल आखली आहे. हा पक्ष शेवटच्या क्षणी महापालिकेच्या सत्तेच्या राजकारणात सहभागी होईल, अशी दाट शक्यता आहे.

मालेगाव शहराच्या सत्तेमध्ये राज्य शासनाचा आशीर्वाद आणि निधी दोन्हींची गरज आहे. त्यामुळे पुन्हा एकदा विकासाचे नाव पुढे करून इस्लाम पक्ष शिवसेनेची मदत घेण्याच्या हालचाली आहेत. त्यासाठी प्राथमिक चर्चा झाल्याचे बोलले जाते. यानिमित्ताने मालेगावच्या राजकारणात इस्लाम पक्ष नवी खेळी खेळण्याची तयारी करीत आहे.

महापौर पदाचे हे डावपेच यशस्वी करण्यासाठी विरोधकांना चुचकारण्याचे राजकारण सुरू आहे. शहरातील बहुसंख्य मतदार अल्पसंख्यांक समाजाचे असल्याने त्यांना शिवसेनेशी युती केलेली पचनी पडणार नाही. त्यामुळे वातावरण निर्मितीचा भाग म्हणून माजी आमदार शेख पडद्याआड वेगळी अन् जाहिरपणे वेगळीच भूमिका मांडताना दिसतात.

--------