Dada Bhuse Politics: मालेगाव महापौरपदासाठी ‘इस्लाम’ला पाठिंबा? शिवसेना म्हणते, कुछ भी हो सकता है!

Malegaon Mayor election controversy: महापालिका निवडणुकीत मालेगाव शहर दुर्लक्षित होते. मात्र निवडणुकीनंतर महापौर मालेगावच्या राजकारणाची जोरदार चर्चा आहे. रोज त्याला नवे वळण मिळते आहे.

मालेगाव महापौर पदासाठी इस्लाम पक्षाचे माजी आमदार असिफ शेख यांच्या भोवती राजकारण फिरते आहे. पक्षाने हिंदुत्वाचे राजकारण करणाऱ्या शिवसेना एकनाथ शिंदे पक्षाला प्रस्ताव दिला होता. त्यावरून राजकीय वादाला तोंड फुटले आहे.

शिवसेना शिंदे पक्षाचे नेते आणि शिक्षण मंत्री दादा भुसे यांनी याबाबत भूमिका मांडली होती. पाठिंबा देण्यास तयारी नसल्याचे सुतोवाच त्यांनी केले. त्यामुळे शिवसेना माजी आमदार शेख यांना साह्य करणार नाही, हे सप्ष्ट झाले. मात्र यावर अद्यापही पडदा पडलेला नाही.

माजी आमदार आसिफ शेख यांच्या पक्षाकडे ३५ नगरसेवक आहे. त्यांनी युती केलेला समाजवादी पक्षाकडे पाच नगरसेवक आहेत. बहुमतासाठी त्यांना तीन नगरसेवकांची गरज आहे. त्यासाठी काँग्रेसने पाठिंबा देऊ केला आहे. मात्र काँग्रेस आणि माजी आमदार असिफ शेख यांच्यात एकोपा झालेला नाही.

या पार्श्वभूमीवर हिंदुत्वाचे राजकारण करणाऱ्या शिवसेना शिंदे पक्षाची मोठी अडचण झाली आहे. पक्षाला १८ जागा मिळाल्या आहेत. त्यामुळे महापौर पदासाठी बार्गेनिंग करण्याची त्यांची सर्वाधिक ताकद आहे. हिंदुत्वाचे राजकारण त्यात आडवे आले आहे.

शिवसेना जिल्हाप्रमुख संजय दुसाने यांनी लवकरच पक्षाच्या गटाची नोंदणी होणार आहे. त्यानंतर पुढील राजकीय धोरण ठरेल. अद्याप काहीही ठरलेले नाही. कोणताही निर्णय झालेला नाही. महापौर पदासाठी कोणाला पाठिंबा द्यायचा किंवा नाही याचा निर्णय पक्षाचे वरिष्ठ नेते घेतील, असे म्हटले आहे.

त्यामुळे पुन्हा एकदा मालेगाव महापौर पदाच्या निवडणुकीबाबत शिवसेनेच्या राजकारणाविषयी अनिश्चितता वाढली आहे. या पक्षाने अद्याप आपले पत्ते खुले केलेले नाही. त्यामुळे महापौर पदाच्या निवडणुकीत काहीही होऊ शकते, अशी चर्चा सुरू आहे.