Manikrao Kokate : धुळ्यात फजिती झाल्यावर कोकाटे माघारी फिरले, पुढे जळगावात जाणंच टाळलं ! ..काय घडलं?

Manikrao Kokate : विधिमंडळात अधिवेशनादरम्यान ऑनलाइन रमी खेळतानाचा व्हिडीओ व्हायरल झाल्यापासून कृषीमंत्री माणिकराव कोकाटे मोठ्या अडचणीत सापडले आहेत. शुक्रवारी धुळे जिल्ह्यात त्यांच्या राजीनाम्याची मागणी करत त्यांना काळे झेंडे दाखवण्यात आले. त्याच दिवशी सायंकाळी कोकाटे जळगाव जिल्ह्यातील चोपड्यात पक्षाच्या कार्यक्रमासाठी उपस्थित राहणार होते. मात्र, धुळ्यातील अनुभव लक्षात घेता त्यांनी तो दौरा रद्द केला. चोपड्यात त्यांची वाट पाहत बसलेल्या कार्यकर्त्यांचा हिरमोड झाला.

यापूर्वी शेतकऱ्यांसंदर्भात वेगवेगळी वादग्रस्त वक्तव्य कोकाटे यांनी केली आहेत. अशातच सभागृहाचे कामकाज चालू असताना मोबाईलवर रमी गेम खेळतानाची त्यांची व्हिडीओ सगळीकडे फिरत आहे. विरोधकांनी कोकाटे यांच्या राजीनाम्याची मागणी केली आहे. विरोधकांनी कोकाटे यांचा राजीनामा घेण्यासाठी अजित पवार यांच्यासह सरकारला घेरलं आहे. अशात कोकाटे यांच्यावर मुख्यमंत्री देवेंद्र फडणवीस यांनीही दोनवेळा नाराजी व्यक्त केली. तर राष्ट्रवादीचे राष्ट्रीय अध्यक्ष व उपमुख्यमंत्री अजित पवार यांनीही कोकाटे यांच्या मंत्रि‍पदाबाबत मंगळवारपर्यंत निर्णय होणार असल्याचे सांगितले आहे.

दरम्यान शुक्रवारी मंत्री कोकाटे हे शिंदखेडा तालुक्यात एका पेट्रोल पंपाच्या उद्घाटनासाठी गेले होते. मात्र राष्ट्रवादी शरचंद्र पवार पक्षाच्या कार्यकर्त्यांनी त्यावरुनही कोकाटे यांना जाब विचारला. धुळे जिल्ह्यात महिनाभरापासून चांगला पाऊस नाही. शेतकऱ्यांवर दुबार पेरणीचे संकट ओढवले आहे. अशात शेतकऱ्यांच्या बांधावर न जाता खासगी पेट्रोल पंपाच्या उद्घाटनासाठी कृषिमंत्र्यांना कसा वेळ मिळतो असा सवाल त्यांना विचारला.

तसेच कोकाटे धुळ्यात ज्या हॉटेलवर थांबले होते, त्या हॉटेलबाहेर राष्ट्रवादी शरदचंद्र पवार पक्षाच्या व शिवसेना उद्धव बाळासाहेब ठाकरे पक्षाच्या कार्यकर्त्यांनी गराडा घातला. त्यांना काळे झेंडे दाखवून त्यांच्या विरोधात निदर्शने केली. शेतकऱ्यांच्या विरोधात वारंवार अपमानजनक वक्तव्य करणाऱ्या कोकाटे यांची अजित पवार यांनी मंत्रिमंडळातून हकालपट्टी करावी अशी मागणी आंदोलकांनी केली. यावेळी आंदोलकांनी कोकाटे यांनी बराच वेळ हॉटेलच्या बाहेर पडू दिले नाही. त्यामुळे कोकाटे यांची चांगलीच फजिती झाली.

शिंदखेडा तालुक्यातील पेट्रोल पंपाचे उद्घाटन करुन झाल्यानंतर कृषिमंत्री कोकाटे हे दुपारी साडेतीनच्या सुमारास जळगाव जिल्ह्यातील चोपडा शहराकडे रवाना होणार होते. त्यानुसार, मंत्री कोकाटे यांच्या दौऱ्याचे नियोजन जळगाव जिल्हा प्रशासनाला प्राप्त झाले होते. सायंकाळी राष्ट्रवादी काँग्रेसतर्फे आक्कासो. शरश्चंदिका पाटील नाट्यगृहात उपमुख्यमंत्री अजित पवार यांच्या वाढदिवसानिमित्त आयोजित गुण गौरव कार्यक्रमास ते उपस्थित राहणार होते. चोपड्यातील कार्यक्रम आटोपून पुढे नंदुरबारला ते जाणार होते.

परंतु, धुळे जिल्ह्यातील शिंदखेडा तालुक्यातच उद्धव ठाकरे व शरद पवारांच्या कार्यकर्त्यांनी कोकाटेंची पळता भूई केली. त्यामुळे कृषिमंत्री कोकाटे यांनी चोपडा तालुक्याचा दौरा रद्द करण्याचा निर्णय घेतला. तिकडे चोपडा तालुक्यातील पक्षाच्या पदाधिकाऱ्यांनी जय्यत तयारी करून ठेवली होती. कार्यक्रमाच्या निमंत्रण पत्रिकाही वाटल्या गेल्या होत्या. परंतु कोकाटे उपस्थित न राहिल्याने कार्यकर्त्यांचा हिरमोड झाला. इतर नेते मंडळी व पदाधिकाऱ्यांच्या उपस्थितीत कार्यक्रम घ्यावा लागला. त्यामुळे याप्रकरणाची जिल्ह्यात चांगलीच चर्चा रंगी आहे.