Maratha Reservation Issue: याचिकाकर्ते विनोद पाटील यांनी छगन भुजबळ यांना सुनावले, चुकीची माहिती पसरवू नका.

Maratha Reservation News: अन्न व नागरी पुरवठा मंत्री छगन भुजबळ यांनी नागपूर येथे मराठा आरक्षणाबाबत विरोधी भूमिका घेतली. मराठा समाजाला आरक्षण नको, असे सांगितले. त्यांच्या भूमिकेला अभ्यासक विनोद पाटील यांनी विरोध केला आहे.

नागपूर येथील ओबीसी परिषदेत छगन भुजबळ यांनी मराठा समाजाला आरक्षण देणे चुकीचे असल्याचे म्हटले आहे. या वक्तव्यावर विविध प्रतिक्रिया उमटत आहेत. मराठा आरक्षणाबाबत याचीकाकर्ते विनोद पाटील यांनी त्यावर तीव्र प्रतिक्रिया व्यक्त केली आहे.

मराठा समाज मागास आहे की नाही, यासंदर्भात विविध आयोग नेमले गेले. यातील शेवटच्या आयोगाने मराठा समाज मागास आहे, असा अहवाल दिला आहे. हा अहवाल राज्य शासनाने स्वीकारला. याचा विसर मंत्री असूनही छगन भुजबळ यांना कसा पडतो?

मराठा समाजाच्या आरक्षणासंदर्भात शेवटच्या आयोगाने दिलेला अहवाल विधिमंडळाच्या पटलावर ठेवण्यात आला. त्यावर मतदान होऊन तो स्वीकारण्यात आला. त्यात मंत्री म्हणून छगन भुजबळ यांनी देखील मतदान केले.

आयोगाने मराठा समाज मागास आहे, अशी स्पष्ट शिफारस केली आहे. त्यावर मंत्री भुजबळ यांनी अनुकूल मतदान केले. याचाच अर्थ त्यांनी मराठा समाज मागास असल्याचे मान्य केले आहे. त्यामुळे सध्या मंत्री भुजबळ जी वक्तव्ये करीत आहेत, ती त्याला अनुसरून नाहीत.

हा इतिहास असताना मंत्री भुजबळ हे नागपूर येथे वेगळी भूमिका कशी काय मांडू शकता?. जाणीवपूर्वक मराठा समाजाच्या आरक्षणाविरोधात माहिती कसे पसरवतात. राज्य सरकारचा घटक म्हणून असे करता येते का?. भुजबळ यांना आपणच केलेले मतदान मान्य नाही का? असा प्रश्न विनोद पाटील यांनी केला.

मराठा समाजाला आरक्षण देण्याची घोषणा राज्य सरकारने केली. त्यामुळे खरोखर कोणाच्या आरक्षणाला धक्का लागलेला आहे का?. कोणाचे आरक्षण कमी होणार आहे का? प्रश्नाचे उत्तर नाही असे आहे. ही वस्तुस्थिती असताना सरकारचा भाग असलेल्या आणि मंत्री म्हणून भुजबळ यांनी या विषयावर असा प्रचार करणे योग्य नाही. हे तातडीने थांबवावे, असे आवाहन पाटील यांनी केले.

------