Prajakt Tanpure meet Ajit Pawar : जयंत पाटलांना मोठा धक्का; सख्खे भाचे प्राजक्त तनपुरेंनी घेतली अजित पवारांची भेट

राजेंद्र त्रिमुखे

Nagar News : राष्ट्रवादी काँग्रेसमधील एक मोठा गट अजित पवार यांच्या नेतृत्वाखाली शिंदे-फडणवीस सरकारमधे सहभागी झाला आहे. त्यानंतर शरद पवारांच्या गटात किती आमदार आहेत, यावर मोठी चर्चा आहे. राष्ट्रवादी काँग्रेसचे प्रदेशाध्यक्ष जयंत पाटील यांचे सख्खे भाचे, राहुरीचे आमदार प्राजक्त तनपुरे हे शरद पवारांसोबत निश्चित राहतील, असे मानले जात होते. मात्र, त्यांनी ता. ४ जुलै सकाळीच अजित पवारांची भेट घेतल्याने मोठ्या चर्चेला उधाण आले आहे. हा जयंत पाटलांना मोठा धक्का मानला जात आहे. (MLA Prajakt Tanpure meet Ajit Pawar)

नगर (Nagar) जिल्ह्याचा विचार करता जिल्ह्यात राष्ट्रवादी कॉंग्रेसचे सहा आमदार आहेत. यातील कर्जत-जामखेडचे आमदार रोहित पवार आणि राहुरीचे आमदार प्राजक्त तनपुरे (Prajakt Tanpure) हे शरद पवार (Sharad Pawar) यांच्या सोबत असल्याचे खात्रीने सांगितले जात होते. नगरचे आमदार संग्राम जगताप हे अजित पवार यांच्या सोबत आणि पारनेरचे आमदार नीलेश लंके, अकोल्याचे आमदार किरण लहामटे हे द्विधा मनस्थितीत असल्याचे दिसले.

कार्यकर्त्यांशी चर्चा करून आमदार लंके आज (ता. ४ जुलै) निर्णय घेणार आहेत, तर मुंबईतील पाच जुलैच्या बैठकीवेळी निर्णय घेऊ, असे आमदार लहामटे यांनी सांगितले आहे. त्यामुळे त्यांचा निर्णय स्पष्ट नसल्याचे दिसून येत आहे. कोपरगावचे आमदार आशुतोष काळे हे विदेशात असले तरी ते अजित पवारांसोबत (Ajit Pawar) जातील, असे बोलले जातेय.

आमदार रोहित पवार हे शरद पवार यांचे नातू असून घडामोडी सुरू झाल्यापासून ते सतत शरद पवारांच्या सोबत दिसून आले आहेत. सातारा दौऱ्यातही ते शरद पवार यांच्यासोबत सावलीसारखे होते. तिथे त्यांनी पत्रकार परिषदही घेतली.

जयंत पाटील यांचे भाचे असलेले प्राजक्त तनपुरे हे शरद पवारांच्या सोबतच राहतील, असे राजकीय विश्लेषक छातीठोकपणे सांगत होते. मात्र, आज (४ जुलै) त्यांनी सकाळीच अजित पवार यांची भेट घेतल्याने मोठ्या चर्चेला उधाण आले आहे. तनपुरे यांनी अजित पवार यांच्या गटात सामील होण्याचा निर्णय घेतला असल्याचे बोलले जात आहे.

प्राजक्त तनपुरे यांचा राहुरी मतदारसंघात पाथर्डी-नगर तालुक्याचा बराचसा भाग आहे. तीन तालुक्यांत विस्तारलेला त्यांचा विधानसभा मतदारसंघ आहे. यात नगर, पाथर्डी तालुक्यातील भागात भाजपचे त्यांचे राजकीय प्रतिस्पर्धी शिवाजी कर्डीले हे तगडे प्रतिस्पर्धी आहेत. सन २०१९ मध्ये झालेला पराभव कर्डीले यांना धक्का देणारा होता. मात्र, त्यानंतर त्यांनी मतदारसंघातील तीनही तालुक्यांत मोठी मोर्चेबांधणी सुरू ठेवली आहे. त्यांच्या जोडीला भाजप खासदार सुजय विखे यांचे खंदे समर्थन आहे.

एकूणच २०२४ ची विधानसभा निवडणुक ही कर्डीले यांनी विखेंच्या साथीने जिंकून आणण्याचा चंग बांधलेला आहे. अशात राष्ट्रवादी काँग्रेसमध्ये निर्माण झालेल्या दुफळीत पुन्हा निवडून यायचे असेल तर अजित पवार यांच्या सोबत जाणे अशी राजकीय अपरिहार्यता प्राजक्त तनपुरे यांच्या समोर आहे. त्यातून एकूण राजकीय भवितव्याचा विचार करून तनपुरे यांनी अजित पवार यांच्यासोबत जाण्याचा निर्णय घेतलेला असावा, अशी शक्यता आहे.

प्राजक्त तनपुरे अजित पवार गटात सामील झाले, तर भाजपच्या शिवाजी कर्डीले यांची मोठी अडचण होणार आहे. त्यांना उमेदवारीचे काय, असा प्रश्न त्यांच्या पुढे आणि कार्यकर्त्यांत निर्माण होणार आहे. महत्वकांक्षी असलेले कर्डीले हे काय भूमिका घेणार, याचीही उत्सुकता आता निर्माण झाली आहे.