Sharad Pawar Politics : मविप्र विद्यापीठाच्या वादात मोठा ट्विस्ट, विरोधकांपाठोपाठ आता सत्ताधारी पवारांच्या दरबारी

Nashik News : मराठा विद्याप्रसारक (मविप्र) संस्थेत स्वयंम सहाय्यीत विद्यापीठ करण्याचा निर्णय विचाराधीन आहे. या पार्श्वभूमीवर सत्ताधारी आणि विरोधक यांच्यातील वाद चांगलाच पेटला आहे. या पार्श्वभूमीवर संस्थेचे अध्यक्ष सुनिल ढिकले यांनी काल जेष्ठ नेते शरद पवार यांची भेट घेतली होती. त्यानंतर आता सत्ताधारी गटाचे सरचिटणीस अॅड. नितीन ठाकरे यांनीही शरद पवार यांची भेट घेतली आहे. त्यामुळे नाशिकच्या राजकीय वर्तुळात चर्चेला उधाण आलं आहे.

यासंदर्भात आपल्या फेसबुक पोस्टवरुन नितीन ठाकरे यांनी माहिती दिली आहे. त्यांनी म्हटलं आहे की, मविप्र समाजाबद्दल मनामध्ये नेहमीच जिव्हाळा असणारे आमचे मार्गदर्शक व आदरणीय श्री. शरदचंद्र पवार साहेब आणि आदरणीय खासदार सौ. सुप्रियाताई सुळे यांची भेट घेतली. मविप्र विद्यापीठ संदर्भात त्यांच्याशी सखोल चर्चा करून त्यांनी व्यावसायिक अभ्यासक्रमासाठी संस्थेचं विद्यापीठ निर्मिती ही काळाची गरज आहे अशा प्रकारचं स्पष्टीकरण देऊन या संदर्भात सविस्तर मार्गदर्शन केले. मविप्र समाजाच्या वाटचालीबद्दल साहेबांनी व ताईंनी समाधान व्यक्त केले व शुभेच्छा दिल्याचे नितीन ठाकरे यांनी म्हटले आहे.

दरम्यान अध्यक्ष सुनिल ढिकले यांनी देखील याआधी शरद पवारांची भेट घेतली होती, त्यावेळी स्वतंत्र विद्यापीठाला माझी पसंती नाही असं शरद पवार यांनी सांगितल्याचे ढिकले यांनी सांगितलं होतं. मात्र नितीन ठाकरे यांनी शरद पवार यांच्या भेटीनंतर शरद पवारांचे विद्यापीठाच्या बाजुने मत असल्याचं सांगितलं आहे. दोन्ही गटाने पवारांची भेट घेऊन केलेल्या वेगवेगळ्या दाव्यांमुळे मविप्रच्या वर्तुळात सध्या मोठ्या संभ्रमाचे व गोंधळाचे वातावरण निर्माण झाले आहे. (Nashik News)

सुनिल ढिकलेंनी भेट घेतली त्यावेळी पवार काय म्हणाले?

शरद पवार यांच्या नेतृत्वाखाली काम करणाऱ्या रयत शिक्षण संस्थेने देखील अद्याप स्वतंत्र विद्यापीठाचा विषय स्वीकारलेला नाही. तसेच बारामती येथील विद्या प्रतिष्ठान संस्थेत ३५ हजार विद्यार्थी शिक्षण घेतात, या संस्थेतही स्वतंत्र विद्यापीठ करण्याचा विचार आम्ही टाळल्याचे पवार म्हणाले. तसेच पुणे विद्यापीठ हे जागतिक दर्जाचे आणि राज्यातील पहिल्या क्रमांकाचे असल्याने विद्यार्थ्यांना स्वतंत्र विद्यापीठाऐवजी पुणे विद्यापीठाची पदवी नेहमीच पसंती असते असं पवार म्हणाल्याची माहिती विरोधी गटाने दिली.

विरोधी गटाकडून विरोध होत असला तरी मविप्र संस्थेचे सरचिटणीस नितीन ठाकरे यांनी विद्यापीठ निर्मिती बाबत आग्रही भूमिका घेतली आहे. त्यावरून सत्ताधारी आणि विरोधक अशा दोन गटांतील हा वाद आता शरद पवारांच्या दरबारात पोहचला असून त्यावरुन राजकारण रंगले आहे. दरम्यान आजच्या मविप्रच्या वार्षिक सर्वसाधरण सभेत काय निर्णय होतो याकडेही सभासदांचे लक्ष लागले आहे.