Ajit Pawar NCP : नाशिकच्या चार जणांचा मंत्रिपदासाठी दावा, संधी मिळणार तरी कोणाला ?

Nashik News: राज्याच्या मंत्रिमंडळात कोणाला संधी मिळणार याची उत्सुकता रोज वाढत आहे. नाशिक जिल्ह्यात निम्मे आमदार राष्ट्रवादी काँग्रेस अजित पवार पक्षाचे आहेत. यातील चार जणांच्या समर्थकांना यंदा मंत्रीपद नक्की मिळणार, अशी अपेक्षा आहे.

राष्ट्रवादी काँग्रेस अजित पवार पक्षात सध्या मंत्रिमंडळासाठी जोरदार फील्डिंग सुरू आहे. नाशिक जिल्ह्यातील छगन भुजबळ हे विद्यमान मंत्री आहेत. यंदा त्यांना त्यांच्याच पक्षातील व तेवढ्याच तोलामोलाच्या आमदारांचे आव्हान आहे. विशेषतः पक्षाचे नेते उपमुख्यमंत्री अजित पवार यांनी याबाबत केलेली विधाने त्यासाठी कारणीभूत ठरली आहेत.

जिल्ह्यात छगन भुजबळ आणि माणिकराव कोकाटे हे सलग पाच वेळा आमदार म्हणून निवडून आले आहेत. याशिवाय नरहरी झिरवाळ या विधानसभेचे उपाध्यक्ष पद भूसविलेल्या नेत्याची यंदा चौथी टर्म आहे. सुरगाणा मतदारसंघातील नितीन पवार दुसऱ्यांदा विजयी झाले आहेत. या चारही जणांच्या समर्थकांनी उघडपणे मंत्रिपदासाठी लॉबिंग आणि दावे केले आहेत.

विशेषतः भुजबळ यांचा समर्थकांनी तर नाशिकचे पालकमंत्री म्हणून भुजबळ यांनाच संधी मिळावी, यासाठी देव पाण्यात टाकले आहेत. नितीन पवार यांच्या समर्थकांनी ही सप्तशृंगी देवी सह अन्यत्र धावा केला आहे. विशेष म्हणजे विधानसभेचे उपाध्यक्ष नरहरी झिरवाळ यांच्यासाठी नाशिकच्या शिष्टमंडळाने उपमुख्यमंत्री पवार यांची भेट घेतली. काल वाशिम येथील शिष्टमंडळाने उपमुख्यमंत्री पवार यांना झिरवाळ यांच्यासाठी साकडे घातले.

पालघर आणि ठाणे येथील शिष्टमंडळ देखील अजित पवार यांना आज भेटले. आदिवासी नेता म्हणून आणि सर्वसामान्यांमध्ये वावर असल्याने नरहरी झिरवाळ यांना संधी द्यावी, अशी त्यांच्या समर्थकांची मागणी आहे. त्यामुळे यंदा मंत्री भुजबळ यांना नाशिक जिल्ह्यातील इच्छुक मंत्र्यांची देखील स्पर्धा आहे.

नाशिक जिल्ह्यातून यापूर्वी शिवसेना एकनाथ शिंदे पक्षाचे दादा भुसे हे मंत्री व नाशिकचे पालकमंत्री होते. याशिवाय अजित पवार पक्षाकडून भुजबळ यांना संधी देण्यात आली होती. सध्या १५ पैकी १४ आमदार सत्ताधारी महायुतीचे आहेत. त्यामुळे अनेकांना मंत्री पदाची स्वप्ने पडू लागली आहेत.

मंत्र्यांच्या स्पर्धेत अनेक नवीन नावे पुढे येत असल्याने नेत्यांवरही दडपण येत आहे. अशा स्थितीत आमदारांच्या समर्थकांनी विविध नेत्यांच्या गाठीभेटी आणि संपर्क वाढवला आहे. नाशिकचा मंत्री कोण? याविषयी आता सगळीकडे चर्चा जोरात आहे.

राष्ट्रवादी काँग्रेस अजित पवार पक्षाचे नेते उपमुख्यमंत्री पवार यांनी विधानसभा निवडणुकीच्या प्रचार दौऱ्यात माणिकराव कोकाटे यांना आमदार करू, असे आश्वासन दिले होते. याशिवाय श्री भुजबळ हे विद्यमान मंत्री आहेत. नरहरी जिरवाड हे देखील त्यासाठी दावेदार मांडले जातात. त्यामुळे राज्यात मुख्यमंत्री कोण? याची चर्चा असली तरी नाशिकमध्ये मात्र मंत्री कोण? हाच चर्चेचा विषय आहे.