Nashik BJP : नाशिक भाजपमध्ये झालेला एबी फॉर्मचा गोंधळ सुनियोजित होता का? शहराध्यक्षांच्या अहवालाने निर्माण झाला प्रश्न

Nashik Politics : भाजपच्या एबी फॉर्म वाटपात सुधाकर बडगुजर यांच्या कुटुंबात चार एबी फॉर्म दिले गेले. भाजपच्या माजी नगरसेविका भाग्यश्री डेमसे आणि माजी नगरसेवक मुकेश शहाणे यांचा अर्ज बाद झाला. तर एकट्या बडगुजर यांच्या कुटुंबात स्वत: सुधाकर बडगुजर व पत्नी आणि मुलाचा अर्ज पात्र ठरला आहे. बडगुजर म्हणतात की त्यांना दुपारनंतर एबी फॉर्म मिळाले तर ते चार एबी फॉर्म दिले कुणी? हा मोठा प्रश्न उपस्थितीत झाला आहे.

यासंदर्भात भाजप शहराध्यक्ष सुनिल केदार यांनी प्रदेशाध्यक्ष रवीद्र चव्हाण यांच्याकडे अहवाल पाठवला आहे. त्यात सुधाकर बडगुजर यांना चार एबी फॉर्म दिले नाहीत तर व्हिलोळी येथील व्हिल्यात १०८ एबी फॉर्मचे वाटप झाल्यानंतर उडालेल्या गोंधळामुळे बडगुजर यांच्याकडे चार एबी फॉर्म गेले असावेत अशी सारवासारव सुनिल केदार यांनी प्रदेशाध्यक्षांना पाठवलेल्या अहवालात केली आहे. या अहवालावरुन गोंधळ झाल्याने एबी फॉर्म गहाळ झाले असतील व तेच नेमके बडगुजर यांच्यापर्यंत पोहचले असतील तर झालेला गोंधळ हा सुनियोजित होता का असा संशय घेण्यास जागा आहे.

बडगुजर यांना दुपारनंतर चार एबी फार्म कुणी नेऊन दिले असाही प्रश्न उपस्थितीत केला जाऊ लागला आहे. बडगुजर यांना चार एबी फॉर्म मिळाले होते तर मग त्यांनी अधिक आलेले फॉर्म शहराध्यक्षांकडे परत का केले नाही. भाजप शहराध्यक्ष म्हणतात की गोंधळात हे सगळं झालं. मग हा गोंधळ सुनियोजित कटाचा भाग होता का? असा प्रश्न राजकीय वर्तुळात उपस्थिती केला जाऊ लागला आहे.

कारण नाशिकमध्ये एबी फॉर्मवरुन उडालेल्या गोंधळामुळे भाजपची राज्यभर नाच्चकी झाली आहे. हा ठरवून केलेला गोंधळ होता असा संशय व्यक्त केला जात असून आमदार सीमा हिरे यांनी याबाबत मुख्यमंत्री देवेंद्र फडणवीस व प्रदेशाध्यक्ष रवींद्र चव्हाण यांच्याकडे केलेल्या तक्रारीतही या गोष्टी असल्याचे सांगितले जात आहे.

भाजप आमदार सीमा हिरे यांनी बडगुजर यांच्यावर आरोप करताना एकाच घरात तीन उमेदवारी आणि चार एबी फॉर्म कुणामुळे मिळाले. या मागे कोण आहेत याची चौकशी व्हावी अशी मागणी केली आहे. यावरुन आमदार हिरे यांनी मंत्री गिरीश महाजन यांच्याकडे अंगूलीनिर्देश केल्याचे मानले जात आहे. पक्षातील गैरप्रकारामुळे निष्ठावंतांवर अन्याय झाल्याची भावना आमदार हिरे यांनी व्यक्त केली आहे.

त्याचवेळी आमदार हिरे यांनी केलेल्या तक्रारीत तथ्य नसल्याचे बडगुजर यांनी म्हटले आहे. एबी फॉर्म वाटपाच्या तक्रारीत मी कुठेच नव्हतो. शहराध्यक्ष आणि कोअर टीममार्फत अर्ज दाखल करण्याच्या शेवटच्या दिवशी सकाळीच फॉर्मचे वाटप झाले. मलाच एबी फॉर्म दुपारनंतर मिळाल्याचे सुधाकर बडगुजर यांचे म्हणणे आहे.