Tipu Sultan Politics: टिपू सुलतान वाद; सपकाळ यांच्याकडून भाजपने उद्धव, राज ठाकरेंना घेरले, म्हणाले...

Congress Vs BJP News: काँग्रेसचे प्रदेश अध्यक्ष हर्षवर्धन सपकाळ यांच्या विरोधात भाजप आक्रमक आहे. त्यानिमित्ताने भाजपला काँग्रेसवर टीका करण्याची संधी मिळाली. मात्र भाजपने या आडून भाजप विरोधकांना घेरण्याचा प्रयत्न केला.  

म्हैसूर येथील संस्थानिक टिपू सुलतान यांचा फोटो मालेगावच्या उपमहापौरांच्या कार्यालयात लावण्यात आला होता. त्यावरून मोठा राजकीय वाद निर्माण झाला. आता हा फोटो काढण्यात आला, मात्र राजकारण थांबण्याची चिन्हे नाही. 

काँग्रेसचे प्रदेश अध्यक्ष हर्षवर्धन सपकाळ यांनी टिपू सुलतान विषयावर आपली प्रतिक्रिया दिली होती. त्यांनी भाजपला उत्तर दिले. भाजप दुटप्पी भूमिका घेत असल्याचा आरोप केला होता. त्यांचे हे विधान भाजपने राजकीय मुद्दा केले आहे.

त्यावरून भाजपने राज्यभर काँग्रेस विरोधात आंदोलन सुरू केले. आज आमदार देवयानी फरांदे यांच्या उपस्थितीत भाजप कार्यकर्त्यांनी नाशिकच्या काँग्रेस कार्यालयासमोर निदर्शने केली. त्यावेळी त्यांनी सपकाळ यांच्या राजीनाम्याची मागणी केली.

काँग्रेसचे प्रदेश अध्यक्ष हर्षवर्धन सपकाळ यांनी छत्रपती शिवाजी महाराज यांच्याशी टिपू सुलतान यांची तुलना केली. ही तुलना गैर लागू आहे. छत्रपती शिवाजी महाराज यांच्या सैन्यात सर्व जाती-धर्माचे लोक होते. टिपू सुलतान हा मात्र मुस्लिम धर्मांध वादी होता असा दावा आमदार फरांदे यांनी केला.  

राज्यातील सर्व जनता छत्रपती शिवाजी महाराज यांच्या जयंतीचे तयारी करीत आहे. असे असताना सपकाळ यांनी सर्व शिवाजी महाराजांच्या मावळ्यांचा अपमान केला आहे. त्यामुळे राज्यभरात सर्व शिवाजी महाराजांचे अनुयायी सपकाळ यांच्या विरोधात तुटून पडले आहेत. त्यांनी ताबडतोब राजीनामा द्यावा अशी मागणी आमदार फरांदे यांनी केली. 

या प्रश्नावर शिवसेना पक्षप्रमुख उद्धव ठाकरे, मनसे प्रमुख राज ठाकरे, संजय राऊत यांसह काँग्रेस नेते बाळासाहेब थोरात, विजय वडेट्टीवार ही मंडळी शांत का? त्यांची या प्रश्नावर काय भूमिका आहे? असा प्रश्न करून भाजपने सपकाळ यांच्याकडून ठाकरे बंधूनाही घेरण्याचा प्रयत्न केला.

-----