Nashik Mayor Politics: महापौरपदाच्या आडून नाशिकमध्ये विधानसभेच्या उमेदवारीची फिल्डिंग पुन्हा एकदा चर्चेत, भाजप आमदार झाल्या सावध!

Nashik Mayor News: नाशिकचे महापौर पद महिलांसाठी राखीव आहे. त्यामुळे अनेक नेत्यांनी त्यासाठी पक्ष नेत्यांकडे फिल्डिंग लावली आहे. त्यामुळे सध्या महापालिकेत महापौर पदावरून जोरदार राजकीय डावपेच सुरू आहेत.

नाशिकचा महापौर कोण? यावर आत्तापासून विविध राजकीय खल सुरू आहेत. याबाबतचा अंतिम निर्णय जलसंपदा मंत्री गिरीश महाजन हेच घेणार आहे. त्यामुळे याबाबतचे इच्छुक आणि त्यांचे समर्थक मंत्री महाजन यांच्या भोवती गराडा टाकून आहेत.

शहरातील भाजपच्या आमदार मात्र वेगळ्याच कारणाने या घडामोडींवर नजर ठेवून आहेत. महापौर पद महिलांसाठी राखीव आहे. त्यामुळे जी महिला महापौर होईल, ती विधानसभा निवडणुकीसाठी संभाव्य उमेदवार ठरू शकते.

सध्या तरी भाजप पक्षात बहुतांशी नेते महापौर पदाकडे त्याच दृष्टीने पहात आहेत. भाजपकडे महापालिकेत ७२ नगरसेवक आहेत. पक्षाने निवडणुकीत कोणत्याही सहकारी पक्षाशी युती केली नव्हती.

स्वबळावर बहुमतापेक्षा अधिक नगरसेवकांची तजवीज करण्यात भाजप यशस्वी झाला आहे. त्यामुळे आगामी राजकारणाकडे सगळेच नेते अतिशय सावधपणे लक्ष ठेवून आहेत. मंत्री गिरीश महाजन यांच्या सभोवती दिसणारे नेते पाहता, त्यातून वेगळ्या राजकारणाचा वास येऊ लागला आहे.

महापौर पदाची लॉटरी लागल्यावर आपोआपच संबंधित नगरसेवक पुढील विधानसभा निवडणुकीतील इच्छुक असू शकते. नाशिक मध्य मतदारसंघाच्या आमदार देवयानी फरांदे आणि पश्चिम मतदार संघाच्या आमदार सीमा हिरे त्यामुळेच अधिक जागृत झाल्या आहेत.

भाजपकडे महापौर पदासाठी इच्छुक म्हणून हिमगौरी अडके, दिपाली कुलकर्णी, दिपाली गिते, स्वाती भामरे, आणि रूपाली नन्नावरे या नगरसेविका आघाडीवर आहेत. या नावांमुळेच भाजपच्या शहरातील दोन्ही महिला आमदार अधिक सावध झाल्या आहेत. त्यांनी या राजकारणात थेट सहभाग घेतला आहे.

भारतीय जनता पक्षाने यापूर्वी विधानसभा निवडणुकीसाठी उमेदवारी देताना नगरसेविकांना प्राधान्य दिले होते. नुकत्याच झालेल्या विधानसभा निवडणुकीत देखील अन्य पक्षांनी देखील नगरसेवक आणि महापालिकेत पदाधिकारी असलेल्यांनाच उमेदवार केले होते. या घडामोडी पाहता महापौरपदाच्या आडून पुढील विधानसभेची तजवीज होणार असल्याचे बोलले जाते.

-------