Kokate Rummy Video : कोकाटेंचा रमी खेळतानाचा व्हिडीओ रोहित पवारांपर्यंत कसा पोहोचला? सगळी चौकशी करण्यासाठी पोलिसांना फ्री हॅन्ड

Manikrao Kokate : विधिमंडळाच्या सभागृहात कृषी मंत्री असताना माणिकराव कोकाटे यांचा रमी खेळत असल्याचा व्हिडिओ व्हायरल झाला होता. राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी हा व्हिडिओ समोर आणला होता. आमदार पवार यांनी तो व्हिडिओ कुठून आणला? हे अद्याप स्पष्ट झालेले नाही. परंतु हा व्हिडीओ कोकाटेंना चांगलाच भोवला त्यांना कृषीमंत्री पद सोडावे लागले.

यासंदर्भात क्रीडा मंत्री माणिकराव कोकाटे यांनी रोहित पवार यांच्याविरोधात नाशिकच्या न्यायालयात अब्रू नुकसानीचा दावा दाखल केला आहे. सोमवारी या दाव्याची छाननी झाली. त्याआधारे आज गुरुवारी न्यायालयाने याप्रकरणासंदर्भात महत्वाचे आदेश दिले. कोर्टाने आता या प्रकरणाचा सखोल तपास करुन अहवाल सादर करावा असे आदेश पोलिसांना दिले आहेत.

कोर्टाच्या आदेशानंतर या प्रकरणाला वेगळे वळण मिळाले असून आता रोहित पवारांना चौकशीला सामोरे जावे लागण्याची शक्यता आहे. याप्रकरणात कोर्टाने जुन्या सीआरपीसी २०२ कलमाप्रमाणे पोलिस चौकशीचे आदेश दिले आहेत. त्यानुसार विधीमंडळात कोकाटेंचा व्हिडीओ कोणी काढला याचा तपास केला जाणार आहे. चौकशी करुन झाल्यानंतर पोलिसांना न्यायालयात अहवाल सादर करावा लागणार आहे.

कोर्टाने या प्रकरणात पोलिसांना फ्री हॅन्ड दिला असून पोलिस तपासात व्हिडीओ कोणी काढला आणि तो कसा व्हायरल झाला, यावर लक्ष केंद्रित केले जाईल. या दाव्यामुळे राजकीय वर्तुळात चर्चांना उधाण आले आहे. पोलिस तपासात या प्रकरणाची सखोल चौकशी होऊन सत्य समोर येण्याची अपेक्षा आहे.

तत्कालीन कृषिमंत्री कोकाटे यांचा विधान परिषदेत मोबाईवर पत्ते खेळतानाचा व्हिडीओ सोशल मीडियावर व्हायरल झाला. हा व्हिडीओ व्हायरल झाल्यानंतर आमदार रोहित पवार यांच्यासह विरोधकांनी जोरदार टीका करत त्यांच्या राजीनाम्याची मागणी केली होती. अखेर उपमुख्यमंत्री अजित पवार यांनी कोकाटे यांच्याकडील कृषी खाते काढून घेत ते दत्ता भरणए यांना दिले व भरणे यांचे क्रीडा खाते कोकाटे यांना दिले.