Nashik FDA Action : टक्कलवाल्यांना केसांचे स्वप्न दाखवले; FDA'ची नाशिकच्या कॉलेजरोड परिसरात कारवाई; ५० लाखांचे तेल जप्त!

FDA Takes Action Against Ayurvedic Hair Oil in Nashik : सोशल मीडियावर जाहिराती करून टक्कल असलेल्या व्यक्तींना केस पुन्हा उगवण्यासह केसांची वाढ होण्याचे आमिष दाखवले जात होते. या आयुर्वेदिक तेलाच्या विक्रीविरोधात अन्न व औषध प्रशासन विभागाने कारवाई केली आहे. या कारवाईत प्रशासनाने १०० मिली क्षमतेच्या ५ हजार ४० बाटल्या जप्त केल्या असून, जप्त केलेल्या तेलाची एकूण किंमत ५० लाख ३४ हजार ९६० रुपये आहे.

अन्न व औषध प्रशासनाने दिलेल्या माहितीनुसार, कॉलेज रोड परिसरातील विसेमळा येथील सहजीवन कॉलनीतील एका इमारतीत मे. व्ही. एस. न्यू फॅशन झोन या नावाने ब्युटी सलून आणि इमिटेशन ज्वेलरीचा व्यवसाय चालवला जात होता. या सलूनच्या माध्यमातून सोशल मीडियावर केसांसाठीच्या तेलाची जाहिरात केली जात होती. यासंदर्भात विभागाला माहिती मिळाल्यानंतर संबंधित उत्पादनाची पडताळणी करण्यात आली.

अन्न व औषध प्रशासनाच्या तपासणीत संबंधित उत्पादनाच्या लेबलवर केवळ 'मार्केटेड बाय मे. व्ही. एस. न्यू फॅशन झोन, नाशिक' असा उल्लेख आढळला. तसेच बॅच क्रमांक, उत्पादनाची तारीख आणि १०० मिली बाटलीची किंमत ९९९ रुपये नमूद करण्यात आली होती. मात्र, उत्पादन करणाऱ्या कंपनीचे नाव, पत्ता तसेच उत्पादन परवान्याचा तपशील लेबलवर नव्हता.

संस्थेचे मालक योगेश भगत यांच्याकडे या आयुर्वेदिक उत्पादनाच्या निर्मिती किंवा विक्रीसंदर्भातील आवश्यक उत्पादन परवाना आणि कायदेशीर परवानग्या नसल्याचे तपासात समोर आले. त्यामुळे औषधे व सौंदर्य प्रसाधने कायदा, १९४० अंतर्गत प्रशासनाने तेलाचा साठा जप्त केला आहे. तपासातून समोर येणाऱ्या बाबींनुसार पुढील कारवाई करण्यात येईल, अशी माहिती अन्न व औषध प्रशासनाने दिली.

आवाहनाला बळी पडू नये

टक्कल घालवणे, पुन्हा केस उगवणे, वजन कमी करणे असे भ्रामक दावे करणाऱ्या सोशल मीडियावरील जाहिरातींना नागरिकांनी बळी पडू नये. कोणतेही औषध खरेदी करताना त्याच्या लेबलवर उत्पादकाचे नाव, पूर्ण पत्ता व उत्पादन परवाना क्रमांक नमूद असल्याची खात्री करावी असे आवाहन एफडीएने केले आहे.