Suhas Kande : नाशिकचे पालकमंत्री म्हणून भुजबळांना माझा विरोध, सुहास कांदेंनी दंड थोपटले

Chhagan Bhujbal : नाशिक जिल्ह्याच्या पालकमंत्रीपदावरुन महायुतीमधील वाद चव्हाट्यावर आला आहे. पालकमंत्री पदासाठी भाजप नेते गिरीश महाजन यांच्या नावाची चर्चा सुरु आहे. अशात राष्ट्रवादीचे जेष्ठ नेते व अन्न व नागरी पुरवठा मंत्री छगन भुजबळ यांनी पालकमंत्रीपदासाठी आग्रही भूमिका घेतली आहे. परंतु शिवसेना आमदार सुहास कांदे यांनी भुजबळांना विरोध केला आहे.

राष्ट्रवादीचे सात आमदार असल्याने नाशिकमध्ये राष्ट्रवादीचा पालकमंत्री झाला पाहीजे असं भुजबळांचं म्हणणं आहे. त्यावर सुहास कांदे यांनी राष्ट्रवादीचे सात आमदार आहेत पण ते भुजबळांसोबत नसल्याचं म्हटलं आहे. नाशिकचे पालकमंत्री म्हणून छगन भुजबळ यांच्या नावाला माझा विरोध असल्याचं कांदेंनी म्हटलं आहे.

कांदे म्हणाले, मी भुजबळांना एकच विनंती करतो की, राष्ट्रवादीचे सात आमदार आहेत पण ते तुमच्यासोबत आहेत का हे एकदा तपासून पाहा. पालकमंत्री जरी मुख्यमंत्री साहेब ठरवणार असले तरी माझा स्वत:चा भुजबळ साहेबांना व्यक्तिगत विरोध आहे. राष्ट्रवादी व भाजपच्याही आमदारांचा भुजबळांच्या नावाला विरोध असल्याचा दावा कांदे यांनी केला आहे. भुजबळांसोबत आज एकही आमदार नाही ते एकटेच आहेत असही कांदे यांनी म्हटलं आहे.

पालकमंत्रीपदासाठी छगन भुजबळ यांच्या नावाला पहिला उघड विरोध सुहास कांदे यांनी केला आहे. यांसंदर्भात मंत्री छगन भुजबळ यांनाही माध्यम प्रतिनिधींकडून विचारणा झाली. मात्र छगन भुजबळ यांनी सुहास कांदे यांच्याविरोधावर बोलणं टाळलं. यावर मला काहीही बोलायचं नाही असं भुजबळ म्हणाले.

दरम्यान शिवसेनेचे मंत्री संजय शिरसाठ यांनीही सुहास कांदे यांच्या विरोधावर प्रतिक्रिया दिली. ते म्हणाले, पालकमंत्रीपदाबाबत मुख्यमंत्री निर्णय घेतील. पालकमंत्रीपदासाठी वरिष्ठ आहेत. त्यांचा जो काही सामूहिक निर्णय होईल तो सर्वांना मान्य राहील. त्यामुळे त्यावर वाद करण्यात अर्थ नाही.

भुजबळांची मागणी काय ?

नाशिक जिल्ह्यात राष्ट्रवादीचे सर्वांधिक सात आमदार आहेत, त्यामुळे नाशिकचा पालकमंत्री हा राष्ट्रवादीचाच व्हायला हवा. रायगडमध्ये एक जागा असताना आपण एवढी ताकद लावत आहोत तर नाशिकमध्ये सात आमदारांसाठीही तेवढी ताकद लावा असे आवाहन भुजबळांनी प्रदेशाध्यक्ष सुनिल तटकरे व पक्षाध्यक्ष अजित पवार यांना केले आहे.