Nashik Crime : ‘कॉर्पोरेट कंपनीत असं होत राहतं...’ पीडित हिंदू तरुणींनी मेल केला पण एचआरने दुलर्क्ष केलं... तपासात धक्कादायक माहिती उघड

Nashik IT Company Case : नाशिकच्या एका नामांकित बहुराष्ट्रीय आयटी (IT) कंपनीत उघडकीस आलेले लैंगिक शोषण आणि धर्मांतराचे प्रकरण हादरवणारं आहे. पोलिसांनी संशयित टोळीच्या मुसक्या आवळल्या आहेत. तसेच याप्रकरणात एक धक्कादायक बाब समोर आली आहे.

संबंधित संशयितांविरोधात पीडित हिंदू तरुणींनी कंपनीच्या एचआरकडे ई-मेलद्वारे तक्रार केली होती. मात्र कंपनीच्या एचआर अश्विनी चैनानी हीने पीडित महिलांच्या तक्रारीची दखल न घेता संशयितांना पाठीशी घातलं. एचआरने ‘कॉर्पोरेट कंपनीत असं होत राहतं...’ असे म्हणत या प्रकरणाकडे दुर्लक्ष केलं. हे प्रकरण उघडकीस आल्यानंतर संबधित एचआर अश्विनी चैनानी पसार झाली होती. पण पोलिसांनी तिला पुण्यातून ताब्यात घेतलं.

पोलिसांनी एचआर अश्विनीला ताब्यात घेत तीची प्राथमिक चौकशी केली. त्यानंतर सोडून दिलं. मात्र, या प्रकरणी अश्विनीला रीतसर नोटीस बजावण्यात येऊन तिची पुन्हा कसून चौकशी केली जाणार आहे. (Nashik News)

दरम्यान याप्रकणात आतापर्यंत ९ गुन्हे दाखल करण्यात आले आहेत. ८ तरुणींनी पुढे येत पोलिसांत तक्रार दिली आहे. त्यावरुन पोलिसांनी काल सहा संशयितांना बेड्या ठोकल्या होत्या. या प्रकरणाचा तपास आता एसआयटीकडे देण्यात आला आहे. आतापर्यंत तपासात समोर आलेली माहिती धक्कादायक आहे. नोकरीच्या मुलाखतीपासूनच हिंदू तरुणींना लक्ष्य केले जायचे. त्यानंतर त्यांच्यावर अत्याचार व विचित्र छळ केला जात. त्यांच्यावर धर्मांतरासाठी दबाव आणला जात होता. धक्कादायक बाब म्हणजे एका तरुणालाही धर्मांतरासाठी भाग पाडण्यात आल्याचे उघड झाले आहे.

संबंधित कंपनी ही एक बहुराष्ट्रीय आयटी कंपनी आहे. अशा रितीने कंपनीत संशयितांनी धर्मांतरासह महिला कर्मचाऱ्यांवर अत्याचार केल्याच्या घटनेने कंपनीचे धाबे दणाणले आहे. झाल्या प्रकारामुळे कंपनीचे अधिकारी तणावात आहेत. या प्रकरणाची गंभीर दखल कंपनीच्या वरिष्ठ पातळीवर घेण्यात आली असून, पोलिसांना तपासाच्या अनुषंगाने सर्वतोपरी सहकार्य करण्याबाबत कंपनीने तत्परता दर्शविली आहे.