Nashik Politics : शिवसेना-राष्ट्रवादीची खरच युती की भाजपवर दबावतंत्र? मनपाच्या रिंगणात नाट्यमय घडामोडी

Nashik Politics : महापालिका निवडणुकीसाठी जागावाटपाबाबत भारतीय जनता पक्षाकडून कुठलाही प्रतिसाद मिळत नसल्याने महायुतीतील शिवसेना व राष्ट्रवादी काँग्रेसमध्ये युती करण्याच्या हालचाली सुरु आहेत. परंतु जागा वाटपाचे सूत्र अद्याप निश्चित न झाल्याने काल रात्री राष्ट्रवादीचे समीर भुजबळ व शिवसेनेचे दादा भुसे यांच्यात झालेल्या चर्चेतून काहीही निष्पन्न न झाल्याने आज पुन्हा वाटाघाटीसाठी चर्चा होणार असल्याची माहिती सूत्रांनी दिली. ही चर्चा म्हणजे भारतीय जनता पक्षाकडून महायुती करण्यासाठी आवतन यावे यासाठी केलेला दबावाचा भाग आहे असे मानले जात आहे.

काल रात्री उशिरा राष्ट्रवादी काँग्रेसकडून माजी खासदार समीर भुजबळ व शिवसेनेकडून दादा भुसे यांच्यात युतीसंदर्भात चर्चा झाल्याचे सांगण्यात आले. इतकच नाही तर दोन्ही पक्षांची युती निश्चित झाल्याचेही सांगण्यात आले. परंतु या चर्चेत जागा वाटप अद्याप निश्चित न झाल्याने दोन्ही पक्षांच्या प्रमुख नेत्यांमध्ये आज पुन्हा बैठक होणार आहे. त्यामुळे दोन्ही पक्षांमधील युती निश्चित झालेली नसून अद्याप चर्चेचे गुऱ्हाळच सुरु आहे अशी माहिती सूत्रांनी दिली.

दरम्यान काल जे शिवसेना व राष्ट्रवादी यांची युती झाल्याचे व ७०- ५० असे जागांचे सूत्र ठरल्याचे सांगण्यात आले. ते भाजपवर दबाव टाकण्याचा देखील एक भाग असल्याचे बोलले जात आहे. कारण भाजपकडून शिवसेना व राष्ट्रवादीला सन्मानपूर्वक जागा दिल्या जात नसल्याने दोन्ही पक्ष मिळून भाजपवर दबाव टाकण्याचा प्रयत्न करत असल्याचं बोललं जात आहे. दरम्यान भाजपकडून बोलावणे आल्यास दुपारनंतर शिवसेना व राष्ट्रवादीची आजची बोलणी थांबण्याची शक्यता आहे.

सुरुवातीला भाजपने राष्ट्रवादीला दूर ठेऊन शिवसेनेसोबत युतीसंदर्भात चर्चा सुरु ठेवली होती. भाजपकडून शिवसेनेला सुरुवातीला २३ ते २५ जागांचा प्रस्ताव देण्यात आला. परंतु शिवसेनेने ५० जागांची मागणी केली, त्यावर भाजपने ४५ पर्यंत जागा देऊ केल्यास युती करण्याचा निर्णय घेतला. मात्र भाजपकडून शेवटपर्यंत तेवढ्या जागा द्यायला तयार न झाल्याने शिवसेनेने राष्ट्रवादीसोबत गट्टी करुन भाजपवर दबाव आणण्याचा प्रयत्न सुरु केल्याचे बोलले जात आहे.

दरम्यान भाजपने स्वत : 90 उमेदवारांची यादी तयारी केली असून उमेदवारांना घरपोच एबी फॉर्म दिले जाणार असल्याचे सांगण्यात येत आहे. त्यामुळे पक्षश्रेष्ठींच्या पातळीवर जरी महायुती करण्याच्या सूचना असल्या तरी प्रत्यक्षात जागांवरुन एकमत होत नसल्याने महायुतीचे भिजत घोंगडे आहे.