Jalgaon Politics : शिवसेना-भाजपात जागावाटपावरुन धुसफूस? एकनाथ शिंदेंचा मंत्री रागारागात बैठकीतून बाहेर

Jalgaon Politics : जळगाव महापालिकेच्या निवडणुकीमध्ये भाजप व शिवसेना अशी आमच्या दोन पक्षांची युती जाहीर झाली आहे. मात्र, राष्ट्रवादीसोबत आजून चर्चा सुरु आहे असं कालच मंत्री गिरीश महाजन यांनी स्पष्ट केलं होतं. पण भाजप-शिवसेनेची युती जागावाटपावरुन फिस्कटण्याच्या मार्गावर असल्याची चर्चा आहे.

राज्यभरातील महानगरपालिकांमध्ये युतीसाठी महायुतीमधील घटक पक्षांमध्ये खलबते सुरु आहे. नाशिकमध्येही शिवसेनेला सन्मानपूर्वक जागा हव्या आहेत. परंतु भाजपकडून त्या मिळत नसल्याने शिवसेना इतर मार्ग चाचपडू लागली आहे. शिवसेना शिंदे गट व राष्ट्रवादी अजित पवार गट यांच्यात बैठकांचा सीलसीला सुरु आहे. त्याचप्रमाणे जळगावातही युतीसाठी भाजपा आणि एकनाथ शिंदे यांच्या शिवसेनेत युतीसाठी चर्चा होत आहे.

जळगावात भाजप व शिवसेनेची युती जाहीर झाल्याचे मंत्री महाजन यांनी स्पष्ट केले असले तरी जागावाटपावरून अद्याप दोन्ही पक्षांत एकमत झालेले नाही. शिवसेना शिंदे गटाने दिलेला जागांचा प्रस्ताव भाजपाने मान्य केलेला नसल्याची माहिती सूत्रांकडून मिळाली आहे. त्यामुळेच आजच्या बैठकीतून मंत्री गुलाबराव पाटील अवघ्या 15 मिनिटांतच बैठकीतून रागारागात बाहेर पडल्याची माहिती मिळाली.

मिळालेल्या माहितीनुसार, जळगावातील अजिंठा विश्रामगृहात शिवसेना शिंदे गटाचे मंत्री गुलाबराव पाटील व भाजपचे मंत्री गिरीश महाजन यांच्यात जागावाटपासंदर्भात बैठक झाली. या बैठकीत चर्चा सुरु असताना युतीमध्ये शिवसेनेने भाजपाला एकूण 26 जागांचा प्रस्ताव दिला होता. परंतु भाजपाने या हा प्रस्ताव अमान्य केला. त्यामुळे मंत्री गुलाबराव पाटील हे तडकाफडकी बैठकीतून अवघ्या पंधरा मिनिटातच बाहेर पडले.

गेल्या काही दिवसांपासून राष्ट्रवादी अजित पवार गटाला टाळून भाजप आणि शिवसेनेच्या नेत्यांच्या गुप्त बैठका सुरू असल्याचे सांगितले जात होते. आजची बैठक मात्र राष्ट्रवादीला सोबत घेण्यासह जागांचा फॉर्म्युला ठरवण्यासाठी आयोजित करण्यात आली होती. भाजपा आणि शिवसेना शिंदे गटात युतीची घोषणा झालेली आहे. परंतु जागावाटपांचा तिढा अद्याप कायम आहे. त्यातच आज झालेल्या या बैठकीनंतर जळगाव महापालिकेत शिवसेना-भाजपची युती होणार की नाही याकडे राजकीय वर्तुळाचे लक्ष लागून आहे.