Nashik MVP News : मविप्र संस्थेच्या वार्षिक सर्वसाधरण सभेत विद्यापीठ स्थापनेच्या मुद्द्यावरुन विरोधक व सत्ताधारी गटात मोठा गोंधळ उडाला. त्यामुळे सभेनंतरही मविप्र विद्यापीठ स्थापनेचा मुद्दा अधांतरीच आहे. याबाबत अंतिम निर्णयाचा चेंडू आता राष्ट्रवादीचे अध्यक्ष व रयत शिक्षण संस्थेचे नेतृत्व करणारे शरद पवार यांच्या कोर्टात जाणार आहे. शरद पवार यावर दोन्ही गटांची एकत्रित बैठक घेऊन तोडगा काढणार असल्याचे सांगितले जात आहे.
शरद पवार यांची भेट घेत भूमिका मांडण्याबाबत सत्ताधारी व विरोधक अशा दोन्ही गटांची तयारी आहे. त्यामुळे सभेनंतर आता घडामोडींना अधिक वेग आला आहे. याआधीही वार्षिक सर्वसाधरण सभेपूर्वी दोन्ही गटांनी शरद पवारांची भेट घेतली होती. पवारांकडे आपले म्हणणे मांडले होते. आता यासंदर्भात अंतिम निर्णय शरद पवारच घेतील असे एकंदरीतच सगळ्या घडामोडी पाहाता दिसून येत आहे.
दरम्यान सोमवारी सरचिटणीस नितीन ठाकरे यांनी पुन्हा देवळा येथे झालेल्या शैक्षणिक संस्थेच्या कार्यक्रमादरम्यान राष्ट्रवादी काँग्रेस शरदचंद्र पवार पक्षाचे प्रमुख शरद पवार, खासदार सुप्रिया सुळे यांची भेट घेतली. सभेतील घडामोडींची माहिती पवार यांनी घेतली व घडलेल्या प्रकाराबाबत खेद व्यक्त केल्याचे अॅड. नितीन ठाकरे यांनी सांगितले.
विरोधकांकडून कशापद्दतीने गैरसमज पसरवून दिशाभूल केली जात आहे, याची माहिती पवारांना दिली. तसेच शैक्षणिक संस्थेला काळिमा फासला जाईल, असे वर्तन विरोधक करत असल्याचे त्यांच्या निदर्शनास आणून दिले. आमच्या दृष्टीने विद्यापीठ स्थापनेचा विषय मंजूर झालेला असून, संस्थेचे मार्गदर्शक शरद पवार यांच्या साक्षीने विरोधकांच्या शंकांचे निरसन करण्यासाठी मी तयार असल्याचे नितीन ठाकरे यांनी सांगितले.
तसेच विरोधकांसमोर बसून त्यांच्या प्रत्येक दाव्यावर उत्तर देण्यास आपण तयार आहोत. त्यामुळे दोन्ही गटांना समोरासमोर बसवून चर्चा करावी अशी विनंती शरद पवारांना यापूर्वीच आपण केली होती अशी माहिती नितीन ठाकरेंनी दिली. (Nashik News)
तर दुसरीकडे अध्यक्ष सुनिल ढिकले यांनी वार्षिक सभेत बहुमताने विषयाला नामंजुरी दिलेली असल्याने, विद्यापीठ स्थापनेचा विषय आमच्या दृष्टीने संपलेला आहे. शरद पवारांसोबत झालेल्या भेटीतही त्यांनी यासंदर्भात प्रतिकूलता दर्शविली होती. आम्ही नेहमी विविध विविध विषयांवर त्यांचे मार्गदर्शन घेत असतो. त्यांनी चर्चा करण्यासाठी बोलविल्यास आम्ही त्यांच्यासमोर वस्तुस्थिती मांडू असे मविप्र अध्यक्ष डॉ. सुनिल ढिकले यांनी सांगितलं.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.