Nashik Politics : शरद पवारांच्या शहराध्यक्षाचे घर फुटले : निवडणुकीच्या तोंडावर पुतण्याचा भाजपमध्ये प्रवेश

BJP Politics News : भारतीय जनता पक्षात उमेदवारी मिळवताना इच्छुकांची दमछाक होत आहे. त्यातच नव्याने इच्छुकांना प्रवेश दिले जात आहेत. या प्रवेशांनी पक्षातील निष्ठावंतांसाठी भाजपचे इनकमिंग आता चर्चेचा विषय आहे. अशात राष्ट्रवादी काँग्रेस शरदचंद्र पवार पक्षाला पुन्हा एक धक्का दिला आहे. राष्ट्रवादी काँग्रेसचे शहराध्यक्ष गजानन शेलार यांच्या घरातल्या उमेदवारालाच भाजपने फोडले. त्यामुळे भाजपचे हे इनकमिंग चर्चेत आहे.

नाशिकचे राष्ट्रवादीचे शहराध्यक्ष गजानन शेलार यांचे पुतणे बबलू शेलार यांनी सोमवारी भाजप प्रवेश केला. त्यांचा हा प्रवेश अनेकांना धक्का देणारा आहे. यानिमित्ताने भाजपने राष्ट्रवादी काँग्रेसच्या शहराध्यक्षांच्या घरातच फूट पाडली. ही शेलार यांची राजकीय खेळी की भाजप आमदाराची सोय, यावरून गोंधळ आहे.

बबलू शेलार हे महापालिका निवडणुकीत इच्छुक उमेदवार आहेत. राष्ट्रवादी काँग्रेस शरदचंद्र पवार पक्षाकडून महाविकास आघाडीसोबत चर्चा सुरू आहे. या दरम्यान बबलू शेलार यांनी भाजप प्रवेश केला. भाजपमध्ये निवडणूक निवडणूक करण्याबाबत इच्छुकांचा दबाव आहे. इच्छुकांची गर्दी असल्याने महायुतीत जागावाटपात त्याचा अडथळा आहे. या पार्श्वभूमीवर भाजप राष्ट्रवादी काँग्रेस अजित पवार पक्षाशी चर्चा लांबणीवर टाकत आहे.

महायुतीत इच्छुक आणि जागा वाटपाचा हा तिढा सुरू असतानाच अद्यापही इन्कमिंग सुरू आहे. त्यामुळे पक्षातील निष्ठावंत कार्यकर्ते आणि इच्छुक अस्वस्थ झाले आहेत. या प्रवेशांचा निवडणुकीत काय परिणाम होतो याचीही चर्चा या निमित्ताने होत आहे.

महाविकास आघाडीची निवडणुकीची तयारी सुरू आहे. अशा स्थितीत जागा वाटपामध्ये या पक्षांत ओढाताण होत आहे. राष्ट्रवादी काँग्रेस शरदचंद्र पवार पक्षाच्या शहराध्यक्षांच्या कुटुंबातील सदस्यानेच भाजप प्रवेश केला. त्यामुळे महाविकास आघाडीच्या निवडणूक तयारीला धक्का बसला आहे.

राष्ट्रवादी काँग्रेसचे शहराध्यक्ष गजानन शेलार यांच्या कुटुंबातील आणखी काही सदस्य भाजपच्या संपर्कात असल्याचे बोलले जाते. त्यामुळे नाशिक महापालिका निवडणुकीत राजकीय नेत्यांच्या फोडाफोडीला पुन्हा एकदा गती आली आहे. भाजप आणि शिवसेना एकनाथ शिंदे पक्षात यावरून वादाची ठिणगी पडण्याची शक्यता आहे.