Sameer Bhujbal News : मंत्री छगन भुजबळ यांच्या अनुपस्थितीत येवला नगरपालिका निवडणुकीत माजी खासदार समीर भुजबळ यांची रणनीती यशस्वी झाली. नगराध्यक्षपदाची चुरशीची निवडणूक राष्ट्रवादी काँग्रेसने जिंकली. या शिवाय 26 पैकी राष्ट्रवादीच्या 11 आणि भाजपच्या 3 अशा 14 जागा निवडून आल्याने नगरपालिकेवरही बहुमतात सत्ता आली आहे. यानिमित्ताने दराडे बंधू आणि माणिकराव शिंदे यांनी केलेली मोर्चेबांधणी अपयशी ठरल्याचे दिसते.
येवल्याच्या नगरपालिका निवडणुकीला यंदा अनेक वेगळे संदर्भ होते. मंत्री छगन भुजबळ रुग्णालयात दाखल होते. त्यांच्या अनुपस्थितीचा फायदा उठवण्यासाठी त्यांचे सर्वच विरोधक एकवटले होते. भुजबळ यांना रोखण्यासाठी या दोन्ही पक्षाच्या स्थानिक नेत्यांनी पडद्यामागून केलेली हात मिळवणी लपून राहिली नव्हती. भाजप सोबत नसणे ही भुजबळांसाठी धोक्याची घंटा होती. कारण येवला शहरात भाजपला मानणारे कार्यकर्ते आहेत. गेल्या निवडणुकीत भाजपचा नगराध्यक्ष झाला होता.
पण विरोधकांचे हे मनसुबे समीर भुजबळ यांनी भाजपच्या वरिष्ठ नेत्यांसोबत यशस्वी तडजोड करून उधळले. छगन भुजबळ यांनीही मुख्यमंत्री देवेंद्र फडणवीस यांना रुग्णालयातून फोन करून युतीबाबत चर्चा केली. त्यामुळे शिवसेना एकनाथ शिंदे पक्षाच्या माध्यमातून माजी आमदार नरेंद्र दराडे आणि आमदार किशोर दराडे यांनी भुजबळ यांना खुले आव्हान दिले होते. त्यांना भुजबळ विरोधक आमदार सुहास कांदे यांचीही पडद्यामागून साथ होती. मुळात त्यांची एकमेकांना मदत अपेक्षितच होती.
या निवडणुकीत नगराध्यक्षपदासाठी दराडे यांनी आपल्या घरचा उमेदवार दिला होता. इथेच त्यांच्याबाबत पहिली नकारात्मकता तयार झाल्याचे दिसून आले. दराडेंनी कार्यकर्त्याला बळ देण्याचे काम केलेले नाही, त्यांचे सर्व राजकारण कुटुंबासाठी असते असा संदेश यातून गेला. त्यांचे हे धोरण या निवडणुकीत मोठा अडसर ठरला.
विधानसभा निवडणुकीत भुजबळ यांना राष्ट्रवादी काँग्रेस शरदचंद्र पवार पक्षाचे माणिकराव शिंदे यांनी आव्हान दिले होते. यावेळी मात्र शिंदे यांनी दराडे बंधूंसोबत उभे राहण्याचा निर्णय घेतला. उमेदवारांची जमवाजमव करून स्वतंत्र पॅनल उभे करण्याचे प्रयत्न शिंदे यांनी केले नाहीत. त्यामुळे अनेकांचा भ्रमनिरास झाला.
निकालाअंती राष्ट्रवादीचे राजेंद्र लोणारी नगराध्यक्ष झाले. शिवाय राष्ट्रवादीच्या 11 आणि 3 जागा भाजपच्या विजयी झाल्या. दराडे बंधूंनाही 10 आणि राष्ट्रवादी काँग्रेस शरदचंद्र पवार पक्षाला 2 जागा जिंकता आल्या. पण त्यांना ना नगराध्यक्षपदाची निवडणूक जिंकता आली ना नगरपालिकेत बहुमत मिळवता आले. माजी खासदार भुजबळ यांनी प्रचाराची सर्व सूत्रे आपल्या हाती ठेवत या निवडणुकीत बाजी मारली.
मंत्री छगन भुजबळ यांच्या अनुपस्थितीत समीर भुजबळ यांनी निवडणूक जिंकली. भुजबळ यांचा किल्ला शाबूत ठेवण्यात त्यांची रणनीती यशस्वी झाली. त्यामुळे आगामी निवडणुकीसाठी नव्या नेतृत्वाचे बीजारोपण म्हणूनही समीर भुजबळ यांच्याकडे पाहिले जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.