Nashik NMC Election : वसंत गितेंचे पुत्र प्रथमेश यांना यंदा भाजपचे आव्हान, मोठा कस लागणार

BJP vs Vasant Gite Son: नाशिक महापालिका निवडणुकीसाठी प्रभागवार आरक्षण सोडत काल जाहीर झाली. प्रभाग क्रं. १५ हा तीन सदस्यीय प्रभाग आहे. या प्रभागात गेल्यावेळीसारखीच परिस्थिती असून माजी उपमहापौर प्रथमेश गिते, सुमन भालेराव, अर्चना थोरात या तिघांनाही संधी आहे. या प्रभागात मागच्या टर्ममध्ये दोन जांगावर महिला आरक्षण होते मात्र ते आरक्षण आता प्रभाग क्रंमाक १९ मध्ये पडले आहे.

प्रभाग १५ मध्ये काठेगल्ली, भाभानगर परिसराचा समावेश होतो. यंदा या प्रभागात घोषित झालेल्या आरक्षणामुळे गणिते बदलण्याची शक्यता आहे. या प्रभागात यापूर्वी सर्वसाधरण महिला राखीव, ओबीसी महिला राखीव व एक जागा ही खुल्या संवर्गासाठी राखीव होती. यंदा नव्या आरक्षण सोडतीत बदल झाला असून एक जागा ओबीसी राखीव झाली आहे. त्यामुळे या प्रभागात पुरुष व महिला असे दोघांनाही निवडणूक लढवता येणार आहे.

महापालिकेच्या २०१७ च्या निवडणुकीत वसंत गिते यांचे पुत्र प्रथमेश गिते, अर्चना थोरात, सुमन भालेराव भाजपकडून निवडून आले होते. पंरतु यंदा पक्ष बदलाचा परिणाम दिसून येणार आहे. सर्वसाधारण गटातून भाजप पक्षातर्फे निवडून आलेले माजी उपमहापौर प्रथमेश गीते यंदा शिवसेना उद्धव बाळासाहेब ठाकरे पक्षातून उमेदवारी करणार आहे. शिवसेना (उबाठाचे) ते महानगरप्रमुख आहे. त्यामुळे या प्रभागात त्यांचा कस लागणार असून भाजपकडून त्यांना आव्हान असणार आहे.

पंरतु माजी उपमहापौर प्रथमेश गीते यांचे या प्रभागात चांगले काम असल्याचे सांगण्यात येते. त्यांचे काम आणि प्रभुत्व प्रभागात असल्याने त्यांच्या उमेदवारीने भाजप पक्षाचा एक उमेदवार कमी होणार असल्याचे जरी बोलले जात असले तरी शिवसेना उद्धव बाळासाहेब ठाकरे पक्षातून भाजपमध्ये प्रवेश केलेले माजी नगरसेवक सचिन मराठे यांच्यामुळे ती पोकळी भरून निघणार आहे.

सर्वसाधारण गटांमध्ये भाजप पक्षातर्फे अनेक दिग्गज उमेदवार इच्छुक असल्याने उमेदवारी उमेदवारी कोणास द्यायची यावरून भाजपची कोंडी होण्याची शक्यता आहे. त्याचा अप्रत्यक्षरीत्या महाविकास आघाडीला फायदा होण्याची शक्यता वर्तवण्यात येत आहे.