Sudhakar Badgujar Politics: बडगुजर प्रकरणात थेट भाजपच्या वरीष्ठ नेत्यांचाच हस्तक्षेप; हर्षा बडगुजर यांची निवडणुकीतून माघार!

Nashik BJP News: गेले तीन दिवस नाशिक महापालिका निवडणुकीत भाजपच्या नेत्यांचा वाद रंगला होता. माजी नगरसेवक सुधाकर बडगुजर यांच्या घराणेशाहीचा वाद थेट वरिष्ठ नेत्यांकडे पोहोचला होता.

नाशिक महापालिका निवडणुकीत आज नाट्यमय घडामोडी घडल्या. माजी नगरसेवक सुधाकर बडगुजर यांच्या कुटुंबात तिघांना उमेदवारी मिळाली होती. त्यावरून पक्षातील स्थानिक नेत्यांत हा वाद सुरू होता.

माजी नगरसेवक सुधाकर बडगुजर यांच्या कुटुंबात भाजपच्या तिघांना उमेदवारी मिळाली. याविषयी आमदार सीमा हिरे यांनी प्रदेश अध्यक्ष रवींद्र चव्हाण यांच्याकडे तक्रार केली होती. पक्षातील उमेदवारांच्या वादावर मुख्यमंत्री देवेंद्र फडणवीस यांनीही कठोर भूमिका घेतली होती.

त्यानंतर आज वेगाने घडामोडी घडल्या. वरिष्ठांनी सूचना केल्याने सुधाकर बडगुजर यांच्या पत्नी माजी नगरसेविका हर्षा बडगुजर यांनी महापालिका प्रभाग २९ मधून माघार घेतली .त्यामुळे आता या ठिकाणी भाजपने माजी नगरसेविका भाग्यश्री ढोमसे यांना पुरस्कृत केले आहे.

प्रभाग २५ मधून देखील सुधाकर बडगुजर यांचे चिरंजीव दीपक बडगुजर यांनी माघार घेतली. आता भाजपचे अधिकृत उमेदवार म्हणून प्रभाग २९ मधून ते उमेदवारी करणार आहेत. या प्रभागातून भाजपचे अधिकृत उमेदवार माजी नगरसेवक मुकेश शहाणे यांचा भाजपचा अर्ज एबी फॉर्म उशिरा आल्याने यापूर्वीच रद्द झाला होता.

भाजपचे माजी नगरसेवक मुकेश शहाणे यांनी आपला एबी फॉर्म अधिकृत असल्याचा दावा केला होता. मात्र बडगुजर यांच्याकडे देखील एबी फॉर्म होता. सर्वात आधी उमेदवारी अर्ज दाखल केल्याने त्यांचा भाजपचा उमेदवार म्हणून अर्ज वैध ठरला होता.

भाजपच्या वरिष्ठ नेत्यांनी बडगुजर प्रकरणात हस्तक्षेप केला. त्यामुळे सुधाकर बडगुजर यांना एक पाऊल मागे यावे लागले. एकाच कुटूंबात तिघांना उमेदवारी त्यांना अडचणीची ठरली. सर्व घडामोडीत पक्षाचे माजी नगरसेवक मुकेश शहाणे यांचा मात्र पत्ता कट झाला आहे. आता ते अपक्ष उमेदवारी करतात काय? याकडे सगळ्यांचे लक्ष लागले आहे.

-------