NCP Sharad Pawar: शरद पवारांच्या राष्ट्रवादी काँग्रेसचे नेते म्हणतात, भाजपचा ‘हंड्रेड प्लस’ नारा पोकळ ठरणार!

Gokul Pingale News: पुणे आणि पिंपरी चिंचवड महापालिकेत दोन्ही राष्ट्रवादी काँग्रेस एकत्र आल्या आहेत. निवडणुकीनंतर तसा प्रयोग नाशिकमध्येही होऊ शकतो. महापालिका निवडणुकीच्या निकालानंतर वेगळी समीकरणे निर्माण होतील.

नाशिक महापालिका निवडणुकीत सर्वच राजकीय पक्ष जोमाने कामाला लागले आहेत. राष्ट्रवादी काँग्रेस शरदचंद्र पवार पक्ष महाविकास आघाडीचा भाग आहे. या पक्षामुळे भाजपला पर्याय मिळाल्याचा दावा नेत्यांनी केला आहे.

पक्षाचे प्रदेश उपाध्यक्ष गोकुळ पिंगळे यांनी याबाबत दावा केला आहे. सध्या पुणे आणि पिंपरी चिंचवड येथे दोन्ही राष्ट्रवादी काँग्रेस एकत्र आहेत. पवार कुटुंब एकच आहे. भविष्यात देखील ते एकत्र येतील. तसे झाल्यास आश्चर्य वाटायला नको, असे पिंगळे म्हणाले.

गेली दहा वर्ष राज्यात आणि केंद्रात सत्तेत असलेल्या भाजपमुळे नाशिकचा विकास खुंटला आहे. रस्ते, प्राथमिक सुविधा आणि अनेक समस्या अत्यंत बिकट झाले आहेत. नागरिक त्यावर प्रचंड नाराज आहेत.

मतदारांतील नाराजीचा मोठा फटका भाजपला बसणार आहे. भाजपला पर्याय देण्याचा प्रयत्न राष्ट्रवादी काँग्रेस करीत आहे. त्यामुळे भाजपचे ‘हंड्रेड प्लस’ हे उद्दिष्ट कदापि साध्य होणार नाही, असा दावा पिंगळे यांनी केला.

महापालिका निवडणुकीच्या निकालानंतर राष्ट्रवादी काँग्रेस शरद पवार पक्ष महाविकास आघाडी सत्तेत यावी यासाठी प्रयत्न करेन. विरोधकांना एकत्रित करून आघाडी स्थापन करण्यात येईल. भाजपला सत्तेपासून दूर ठेवण्याचे आमचे उद्दिष्ट आहे. त्यामुळे भाजपला ‘हंड्रेड प्लस’ हे उद्दिष्ट कदापी साध्य करता येणार नाही, असा दावा पिंगळे यांनी केला.

आगामी सिंहस्थ कुंभमेळा हा शहराच्या दृष्टीने महत्त्वाचा आहे. मात्र सत्ताधारी भाजप सिंहस्थ कुंभमेळा ऐवजी वेगळ्याच कामांना प्राधान्य देत आहे. कोणात वृक्षतोड करीत आहे. त्यांची ही कृती नाशिककरांना नाराज करणारी ठरली आहे. त्याचा मोठा फटका महापालिका निवडणुकीत भाजपला बसेल.

-----