Nashik Police Recruitment : टोमण्यांवर मात करत खाकीकडे झेप, नाशिकमध्ये पोलिस भरतीच्या मैदानात तृतीयपंथीयाची दमदार कामगिरी

Police Recruitment : समाजात आजही तृतीयपंथीयांकडे पाहण्याचा दृष्टीकोन काहीसा वेगळा अर्थात उपेक्षेचा आहे. मात्र या चौकटी मोडत नाशिकमध्ये एका तृतीयपंथी उमेदवाराने जिद्द आणि मेहनतीच्या जोरावर पोलिस भरतीच्या मैदानात उल्लेखनीय कामगिरी करत सर्वांचे लक्ष वेधून घेतले आहे.

नाशिक ग्रामीण पोलिस दलात चालक पोलिस शिपाई पदासाठी सुरू असलेल्या भरती प्रक्रियेत या उमेदवाराने मैदानी चाचणीत ५० पैकी तब्बल ३९ गुण मिळवले. स्वतःची लिंग ओळख ‘महिला/तृतीयपंथी’ अशी निश्चित करून नियमानुसार ८०० मीटर धावण्याची चाचणी देताना त्यांनी आत्मविश्वासाने मैदान गाजवले.

नाशिक ग्रामीण पोलिस भरतीच्या इतिहासात चालक पोलिस शिपाई पदासाठी तृतीयपंथी उमेदवाराने मैदानी चाचणी यशस्वीरीत्या पूर्ण करण्याची ही उल्लेखनीय घटना ठरली आहे. शारीरिक मोजमापाच्या निकषात ६२ उमेदवार बाद झाले असताना, या उमेदवाराने सर्व तांत्रिक अटी पूर्ण केल्या. महिलांसाठी असलेल्या निकषांनुसार ८०० मीटर धावण्याचे आव्हानही त्यांनी समर्थपणे पार करत ३९ गुण मिळवले.

खाकीचे स्वप्न साकार करण्याची जिद्द आणि त्यादृष्टीने टाकलेलं पाऊल या कामगिरीने उपस्थित अधिकारी, कर्मचारी आणि स्पर्धक उमेदवारांचेही लक्ष वेधून घेतली तसेच मने सर्वांची जिंकली. समाजातील हजारो तृतीयपंथीयांसाठी ही एक प्रेरदायी गोष्ट आहे.

नाशिक ग्रामीण पोलिस दलात चालक पोलिस शिपाईपदासाठी सुरू असलेल्या या भरती प्रक्रियेसाठी एकूण ३ हजार नऊ उमेदवारांना बोलाविण्यात आले होते. त्यांपैकी एक हजार ८२० उमेदवार प्रत्यक्ष चाचणीसाठी हजर राहिले. महिलांसह तृतीयपंथी उमेदवारांनाही यंदा संधी देण्यात आली. शारीरिक मोजमापात ५८ उमेदवार अपात्र ठरले, तर एक हजार ५९५ उमेदवारांनी मैदानी चाचणीचा टप्पा गाठला.

या सर्व पोलिस भरती प्रक्रियेत लक्ष्य वेधून घेतले ते एका तृतीयपंथी उमेदवाराने. नियमित सराव, कठोर परिश्रम आणि समाजातील टोमण्यांकडे दुर्लक्ष करत त्यांनी ५० पैकी ३९ गुण मिळवले. त्यामुळे भरती प्रक्रियेत उपस्थित असलेल्या सर्वांचे लक्ष या कामगिरीकडे वेधले गेले.

दरम्यान, पोलिस अधीक्षक बाळासाहेब पाटील यांच्या मार्गदर्शनाखाली भरती प्रक्रिया पारदर्शक पद्धतीने पार पडत आहे. या भरती प्रक्रियेत तृतीयपंथी उमेदवाराला दिलेल्या या संधीमुळे समानता ही केवळ कागदावर नसून ती मैदानातही उतरली आहे असे म्हणालयला आता हरकत नाही.