Nashik politics : मनसे सोबत युती करण्यास कॉंग्रेसचा विरोध आहे. असे असताना सोमवारी नाशिकमध्ये काँग्रेसच्या नेत्यांनी मनसेच्या सोबत युतीची घोषणा केली. मात्र बैठक संपल्यानंतर अवघ्या काही मिनिटांमध्ये कॉंग्रेसचे स्थानिक नेते तोंडघशी पडले. या बैठकीचा आणि काँग्रेसचा कोणताही संबंध नाही असे प्रदेशाध्यक्ष हर्षवर्धन सपकाळ यांनी स्पष्ट केलं.
नाशिकमध्ये मनसेसोबतच्या बैठकीला कोणताही प्रतिनिधी आपण पाठवला नाही. तसेच जे स्थानिक कॉंग्रेस पदाधिकारी बैठकीला उपस्थित होते त्यांना खुलासा मागणार असून नोटिस पाठवली आहे अशी माहिती सपकाळ यांनी दिली. त्यामुळे नाशिकच्या कॉंग्रेस पदाधिकाऱ्यांवर कारवाई होण्याची शक्यता आहे.
दरम्यान मनसे सोबतचा युतीचा प्रस्ताव आल्यास राष्ट्रीय पातळीवर निर्णय घेतला जाईल असं हर्षवर्धन सपकाळ यांनी स्पष्ट केलं. प्रदेशाध्यक्ष सपकाळांनी फटकारताच नाशिक काँग्रेसमधील पदाधिकारी बाळासाहेब थोरातांकडे दाद मागणार असल्याचे कळते. नाशिकमधील कॉंग्रेसचे पदाधिकारी राहुल दिवे यांच्यासह स्थानिक पदाधिकारी बाळासाहेब थोरात यांच्यासोबत चर्चा करणार आहेत. प्रदेशाध्यक्षांना डावलून पदाधिकारी थोरातांकडे गेल्याने गटबाजीच्या चर्चांना उधाण आले आहे.
दरम्यान याबाबत काँग्रेसचे प्रवक्ते सचिन सावंत यांनीही ट्विट केले आहे. नाशिकमध्ये काँग्रेस पक्षाने महाराष्ट्र नवनिर्माण सेने बरोबर जाण्याचा कोणताही निर्णय घेतलेला नाही. अशा बातम्या चुकीच्या आहेत. असं त्यांनी स्पष्ट केलं. काँग्रेस पक्षाने मनसे सोबत जाण्याचा कुठलाही निर्णय घेतलेला नाही. नाशिक काँग्रेसला अशा प्रकारे युती घोषित करण्याचा अधिकार दिलेला नाही असही त्यांनी स्पष्ट केलं.
नेमकं काय घडलं?
नाशिकमधील महाविकास आघाडीचे नेते आणि मनसेच्या नेत्यांनी आज (दि. १०) एकत्र पत्रकार परिषद घेत एकत्र निवडणुका लढण्याची घोषणा केली. मविआ आणि मनसेच्या स्थानिक नेत्यांनी एकत्र येत नाशिकमध्ये यापुढील सर्व निवडणूका एकत्रित लढवणार असल्याचे स्पष्ट केले. या बैठकीला नाशिकमधील कॉंग्रेस पदाधिकारी देखील उपस्थिती राहिले होते. नाशिकमधील काँग्रेसचे पदाधिकारी राहुल दिवे यांनी पत्रकार परिषदेत म्हटले की, आम्ही वरिष्ठांच्या सांगण्यानुसारच हा निर्णय जाहीर करत आहोत. मात्र त्यांचा हा दावा काही मिनिटात प्रदेशाध्यक्ष सपकाळ व प्रवक्ते सचिन सावंत यांनी खोडला आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.