Nashik Politics : भाजपच्या अटीमुळे येवल्यात प्रॉब्लेम? समीर भुजबळ- गिरीश महाजन यांच्यात बंद दाराआड गुप्तगू..!

Nashik Politics : छगन भुजबळ हे आजारी असल्याने येवल्यासह नांदगाव, मनमाड नगरपालिकेची जबाबदारी त्यांनी माजी खासदार समीर भुजबळ व पंकज भुजबळ यांच्या खांद्यावर टाकली आहे. या पार्श्वभूमीवर येवल्यासह नांदगाव, मनमाड नगरपालिकेत राष्ट्रवादी व भाजपमध्ये युतीसंदर्भात माजी खासदार समीर भुजबळ व भाजपचे मंत्री गिरीश महाजन यांच्यामध्ये नाशिक येथे बंद दाराआड गुप्तगू झाले.

राष्ट्रवादी आणि भाजपच्या युतीबाबत झालेल्या चर्चेची ही दुसरी फेरी आहे. यापूर्वी भारतीय जनता पार्टीचे नाशिक जिल्ह्याचे निवडणूक प्रमुख आमदार डॉ. राहुल आहेर यांनी समीर भुजबळ यांची येवल्यातील संपर्क कार्यालयामध्ये भेट घेतील होती. या भेटीतही येवला नगरपरिषद, नांदगाव, मनमाड संदर्भात चर्चा झाली.

विशेषत: येवला हा छगन भुजबळ यांचा मतदारसंघ असल्याने येथील नगरपालिकेच्या निवडणुकीसाठी भुजबळांनी कंबर कसली आहे. येवला नगरपालिकेवर भाजपचा नगराध्यक्ष होता. त्यामुळे भाजपने या जागेवर दावा केला आहे. तर, दुसरीकडे भुजबळांनी इच्छुकांच्या मुलाखती घेऊन नगराध्यक्षपदाचा उमेदवार निश्चित केल्याचे समजते आहे. त्यामुळे याठिकाणी राष्ट्रवादीसमोर मोठा पेच निर्माण झाला आहे. हा तिढा सोडवण्यासाठी समीर भुजबळ यांची धावपळ सुरु असल्याचे दिसते.

येवला नगरपालिकेत राष्ट्रवादी आणि भाजपची युती झाल्यास मोठे यश मिळण्याची चर्चा आहे. या युतीमुळे विरोधी पक्षांपुढे मोठे आव्हान उभे राहणार आहे. परंतु नगराध्यपदावर भाजपने दावा केल्याने घोडे अडले आहे. येवला भुजबळांचा बालेकिल्ला असून या मतदारसंघावरील प्रभाव टिकवून ठेवण्यासाठी नगराध्यक्षपदावर भुजबळांनी देखील दावा केला आहे व ते त्यावर ठाम असल्याचे बोलले जाते.

महाराष्ट्रातील नगरपरिषद व पंचायत समिती निवडणूक कार्यक्रम जाहीर झाला असून जिल्हा परिषदा, महानगरपालिका यांच्या देखील निवडणुका होऊ घातल्या आहेत. या पार्श्वभूमीवर या निवडणुकांमधील युतीबाबत स्थानिक पातळीवर निर्णय घेण्याच्या सूचना पक्षनेतृत्वाकडून आपल्याला मिळालेल्याची माहिती समीर भुजबळ यांनी दिली आहे. त्यामुळे युतीसंदर्भात चर्चांना वेग आल्याचे दिसत आहे.

नाशिक जिल्ह्यातील येवला, लासलगाव, नांदगाव, मनमाड या परिसरात छगन भुजबळ यांच्या नेतृत्वात आजवर मोठ्या प्रमाणात विकासकामे झालेली आहेत. तसेच येवला-लासलगाव मतदारसंघात अनेक कामे आज प्रगतीपथावर आहेत. उमेदवारी देताना आपण प्रामुख्याने इच्छुकांचा जनसंपर्क, जनहिताची तळमळ, जनतेच्या गरजांची जाणीव, काम करण्याची व निवडून येण्याची क्षमता या गोष्टींना प्राधान्य देणार आहोत असे समीर भुजबळ यांनी सांगितले.