Nashik Politics : काकाने भाजपत प्रवेश करताच पुतण्या शिवसेनेते, दोन चुलत भाऊ आमने-सामने येण्याची शक्यता..

Nashik Politics : मनसेचे सरचिटणीस दिनकर पाटील यांनी भाजपमध्ये प्रवेश केल्याने प्रभाग ९ मध्ये राजकारणाला वेगळं वळण आलं असून मोठी उलथापालथ झाली आहे. दिनकर पाटील यांनी भाजपमध्ये प्रवेश करताच भाजपकडून इच्छुक असलेल्या त्यांच्या पुतण्याने उमेदवारी मिळणार नाही या शक्यतेने शिवसेना शिंदे गटात प्रवेश केला आहे. त्यामुळे ऐन महापालिका निवडणुकीच्या तोंडावर भाजपसाठी हा मोठा धक्का आहे.

दिनकर पाटील व दशरथ पाटील दोघे बंधू असून त्यांच्यात कौटुंबिक मतभेद आहे. त्यामुळे काका दिनकर पाटील यांनी भाजपमध्ये घरवापसी करताच पुतण्या प्रेम दशरथ पाटील यांनी सोमवारी (ता. २९) राजीनामा दिला व त्यानंतर शिवसेना शिंदे गटात प्रवेश केला. प्रेम पाटील यांनी भाजपकडून इच्छुक म्हणून मुलाखत दिली होती.

त्यामुळे प्रभाग क्रंमाक ९ मध्ये आता भाजप विरुद्ध शिवसेना शिंदे गट अशी लढत होण्याची शक्यता असून प्रामुख्याने त्यात दशरत पाटील यांचे चिरंजीव प्रेम पाटील व दिनकर पाटील यांचे चिरंजीव अमोल पाटील या दोन्ही चुलत भावांमध्ये लढत होण्याची शक्यता वर्तवण्यात येत आहे.

तसेच प्रभाग क्रंमाक १३ मध्ये काँग्रेसचे शाहू खैरे यांच्या भाजप प्रवेशाला कडाडून विरोध करणारे गणेश मोरे यांची दखल न घेतली गेल्याने त्यांनीही भाजपला रामराम करत शिंदेसेनेत प्रवेश केला. त्यामुळे मोरे यांची पुन्हा शाहू खैरे यांच्यासोबत लढत होण्याची शक्यता आहे. मोरे हे भाजपचे निष्ठावान कार्यकर्ते होते. तसेच ते आमदार देवयानी फरांदे यांचे कट्टर समर्थक असले तरी खैरे यांना भाजपत घेतल्याने आमदार फरांदे व मोरे यांनी उघडपणे नाराजी व्यक्त केली होती.

माजी महापौर दशरथ पाटील यांचा मुलगा प्रेम पाटील यांच्यासह छावा संघटनेचे अध्यक्ष करण गायकर यांच्या पत्नी सविता गायकर, संजय तुपलोंढे, अर्चना तुपलोंढे, सागर जारे यांनी देखील शिंदेसेनेत प्रवेश केला.

माजी महापौर दशरथ पाटील हे देखील मुलगा प्रेम पाटील याच्या पक्ष प्रवेशावेळी उपस्थित होते. तेव्हा दशरथ पाटील यांनी देखील प्रवेश केला का? असा प्रश्न पत्रकारांनी विचारला असता पाटील यांनी नाही असे सांगितले.