Satyajeet Tambe On Eknath Shinde : एकनाथ शिंदेंना मोदी अन् शहांकडे जाण्याची गरज नाही; सत्यजीत तांबे असं का म्हणाले?

Nashik Sangamner Pune Railway Route : नाशिक-संगमनेर-पुणे मार्गासाठी उपमुख्यमंत्री एकनाथ शिंदे पंतप्रधान नरेंद्र मोदी आणि केंद्रीय मंत्री अमित शहा यांचे लक्ष वेधणार असल्याची ग्वाही दिली. यावरून नाशिक पदवीधरचे आमदार सत्यजीत तांबे यांनी एकनाथ शिंदे यांना मोठा सल्ला दिला आहे. मोदी अन् शहा यांच्याकडे जाण्याची गरज नाही. शेजारच्यांना समजावून सांगितले तरी, हा मार्ग मार्गी लागेल, असे सत्यजीत तांबे यांनी एकनाथ शिंदेंना म्हटलं आहे.

सत्यजीत तांबे यांनी या मार्गाला शिर्डीकडे वळवले जात असल्याचा आरोप केला असून, त्यांनी विखे पाटील पिता-पुत्रांचे नाव न घेता याबाबत बरच काही सांगून टाकलं आहे. या मार्गासाठी निवडणुकानंतर मोठं जनआंदोलन उभारण्याचा इशाराही सत्यजीत तांबेंनी दिला.

संगमनेर (Sangamner) नगरपालिका निवडणुकीसाठी काँग्रेस ज्येष्ठ नेते बाळासाहेब थोरात अन् आमदार सत्यजीत तांबे यांनी कसून फिल्डिंग लावली आहे. कोणतीही उणिव राहणार नाही, याकडे लक्ष देऊन, प्रत्येक आरोपांवर जोरदार प्रत्युत्तर दिलं जात आहे. संगमनेर सेवा समितीच्या माध्यमातून सर्व पक्षीयांना बरोबर घेत, नगरपालिका निवडणुकीला समोरे जाताना, नाशिक-संगमनेर-पुणे हा लोहमार्ग किती आवश्यक आहे, यावर सत्यजीत तांबे यांनी संगमनेर 2.0, अशी ब्ल्यू प्रिंटमधून लक्ष वेधलं आहे.

सत्यजीत तांबे म्हणाले, "एकनाथ शिंदे (Eknath Shinde), सुजय विखे अन् अमोल खताळ यांच्या कालच्या सभेचा आनंद घेतला. एकनाथ शिंदे साहेबांना सांगण्यात आलं की, नाशिक-पुणे रेल्वे ही संगमनेर इथून गेली पाहिजे. थोरात साहेब मंत्री होते, तेव्हा सर्वे झाला. नाशिक-पुणे रेल्वेसाठी हा सर्वे झाला." हायस्पीडची रेल्वे होते. तिथून एक तासांमध्ये माणूस पुण्याला पोहोचणार होता. अर्ध्या तासांमध्ये माणूस नाशिकला पोहोचणार होता. भूसंपादनाची प्रक्रिया देखील झाली. तीनशे कोटी रुपये मंजूर झाले. हे पैसे देखील शेतकऱ्यांना दिले गेले. आजही संगमनेर मधील शेतकऱ्यांच्या सातबारावर नाशिक-पुणे रेल्वेवर हक्क दिसतो, याकडेही सत्यजीत तांबे यांनी लक्ष वेधले.

शिंदेंना शेजारच्यांना समजावण्याचा सल्ला

'मग अचानक तो मार्ग शिर्डीकडे गेला. शिंदे साहेबांनी काल सभेत सांगितलं की, या रेल्वे मार्गासाठी पंतप्रधान नरेंद्र मोदी आणि अमित शहा यांना भेटणार. आणि हा मार्ग संगमनेर मार्गे झाला पाहिजे, अशी विनंती करणार. पण या प्रश्नावर मोदी किंवा अमित शहा यांना भेटण्याची आवश्यकता नाही. यासाठी आमच्या शेजारच्यांना समजून सांगितलं पाहिजे की, हा मार्ग संगमनेरवरून गेला पाहिजे की झालं,' असे सत्यजीत तांबे यांनी म्हटले.

जनआंदोलनाचा इशारा

'कारण तो मार्ग शिर्डीला हेच पळवत आहे. नाशिक-पुणे रेल्वेसाठी मी संगमनेरमधील पाच ते सहा हजार घरांमध्ये गेलो आहे. आई मुलं एकटे राहतात. त्यांची मुलं पुणे-नाशिक-मुंबई-कलकत्ता इथं काम करत आहेत. जी मुलं पुण्याला राहत आहेत, ते मुलं मोटरसायकलवर संगमनेरला घरी येऊन आई-वडिलांची सेवा करतात. ही रेल्वे होण्यासाठी संगमनेरकरांना निवडणुकीनंतर मोठं जनआंदोलन उभारावं लागेल, याशिवाय पर्याय नाही,' असा इशारा सत्यजीत तांबे यांनी दिला. 

रेल्वे मार्गासाठी कोणाचा खोडा

नाशिक-संगमनेर-पुणे ही रेल्वेसाठी शेजाऱ्यांना समजावून सांगा, असे सांगताना सत्यजीत तांबे यांनी विखे पाटील पिता-पुत्रांचे नाव घेतली नाही. मात्र सत्यजीत तांबे यांनी सूचक इशाऱ्यात या रेल्वेसाठी शिर्डी मार्ग नेऊन, कसा खोडा घातला जात आहे, सांगून टाकलं.