Sanjay Raut : 'स्ट्राइक रेट'वरुन राऊतांची मुख्यमंत्र्यांवर बोचरी टीका; म्हणाले, ते जिथे जातात तिथे...

Nashik News, 23 June : शिवसेना ठाकरे गटाचे नेते खासदार संजय राऊत यांनी मुख्यमंत्री एकनाथ शिंदे यांचा चांगलाच समाचार घेतला आहे. लोकसभा निवडणुकीतील 'स्ट्राइक रेट'बद्दल त्यांनी मुख्यमंत्र्यांना टोला लगावला आहे.

शिक्षक मतदारसंघाच्या प्रचारासाठी काल मुख्यमंत्री एकनाथ शिंदे (Eknath Shinde) नाशिकला आले होते. यावेळी त्यांनी लोकसभा निवडणुकीत शिवसेना शिंदे गटाचा स्ट्राइक रेट आणि मते सर्वाधिक असल्याचा दावा केला होता.

शिंदेंच्या या दाव्याची पोलखोल खासदार संजय राऊत (Sanjay Raut) यांनी केली. ते म्हणाले, "मुख्यमंत्री जिथे जातात तिथे शेअर बाजाराप्रमाणे निवडणुकीचे बाजारही वाढतात. हे सगळ्यांना माहिती आहे. त्यामुळे लोकसभा निवडणुकीतील त्यांचा स्ट्राइक रेट हा बेईमानीचा आहे. मुख्यमंत्री शिंदे यांनी पैशांनी स्ट्राइक रेट विकत घेतला. मुंबईची जागा अक्षरशा लुटली. त्यांचा निकाल हा थैल्या आणि खोक्यांचा स्ट्राईक रेट आहे. हे महाराष्ट्रातील जनता चांगलीच ओळखून आहे."

मुख्यमंत्री शिंदे शनिवारी नाशिकला (Nashik) येऊन गेले. त्यांचा हा दौरा कशासाठी होता आणि ते प्रत्येक मतदारसंघात कशासाठी जातात हे सगळ्यांना माहिती आहे. मात्र कोणीही शिक्षकांना विकत घेऊ नये. शिक्षक पेशातील परंपरा मोडू नये. असे करणाऱ्यांना शिक्षक योग्य धडा शिकवतील, असा इशाराही राऊतांनी यावेळी दिला.