Chhagan Bhujbal News : भांडण कसले? अजित पवार हे तर माझे भाऊ!

Chhagan Bhujbal on & disputes with Ajit Pawar : राज्याचे उपमुख्यमंत्री अजित पवार आणि राज्याचे अन्न व नागरी पुरवठा मंत्री छगन भुजबळ यांच्यात ताल सुरात वाद रंगल्याच्या बातम्या आहेत. छगन भुजबळांच्या खुलाशाने त्याला दुजोरा मिळाला आहे. (There was a high voltage discusion in Ajit Pawar & Chhagan Bhujbal on OBC issue)

राष्ट्रवादी काँग्रेसचे (NCP) नेते अजित पवार (Ajit Pawar) आणि छगन भुजबळ (Chhagan Bhujbal) यांच्यात जोरदार खडाजंगी झाल्याचा प्रकार नुकताच घडला. ओबीसी (OBC) आरक्षणाशी संबंधित विषयावर हा वाद होता.

ओबीसी आरक्षणाच्या मुद्द्यावरून उपमुख्यमंत्री अजित पवार आणि अन्न व नागरी पुरवठामंत्री छगन भुजबळ यांच्यात खडाजंगी होऊन वादाची ठिणगी पडली, अशा बातम्या माध्यमांत प्रसारित झाल्या होत्या. ओबीसी विषयावरील राजकारणाचा भाग म्हणून या बातम्या जाणीवपूर्वक पेरण्यात आल्या होत्या, अशीही चर्चा होती.

याबाबत नाशिक दौऱ्यावर असलेल्या छगन भुजबळ यांना पत्रकारांनी छेडले. त्यामुळे अखेर भुजबळ यांनी याबाबत आपले मौन सोडले. यासंदर्भात भुजबळ यांनी आपली भूमिका स्पष्ट केली.

ते म्हणाले, अजित पवार यांच्याशी मी मोठ्या आवाजात बोललो. हा वाद अथवा संघर्ष नव्हता. आम्ही एकाच पक्षाचे आहोत. एका कुटूुंबातील आहोत. त्यामुळे दोन भावांमध्ये जशी चर्चा होते तशी चर्चा झाली. याबाबत माध्यमांनी मात्र पराचा कावळा करण्याचे कारण नसून, राईचा पर्वत केला जात आहे.

ते पुढे म्हणाले, की ओबीसी आरक्षणाबाबत बैठकीत गायकवाड आयोगाची आकडेवारी देण्यात आली. सरकारी नोकऱ्यांमधील आरक्षणाच्या अनुशेषाकडे मी लक्ष वेधले. त्यावर सचिवांनी काही माहिती नसल्याचे सांगितले. त्याबाबत अजित पवार यांनी अशी काही माहिती नाही, ती सत्य नाही, असे सांगितले.

त्यावर तुमच्याकडे माहिती नाही, असे होऊ शकत नाही, असे मी सांगितले. त्यावर माझा मुद्दा थोड्या मोठ्या आवाजात मांडला. मात्र, आमच्यात मतभेद आहेत, असे काहीही नाही. तो विषय तिथेच संपला आहे.