NCP Politics : स्थानिकच्या आधीच दादांच्या नेत्यांचा महायुतीला दे धक्का, स्वबळाचे संकेत देत म्हणाले, 'आता कार्यकर्त्यांविरोधात प्रचार करावा का?

Jalgaon News : राज्यात होणाऱ्या आगामी स्थानिकच्या रणधुमाळीला सुरूवात झाली असून जिल्हापरिषद सभापती आणि नगरपंचायती आणि नगरपरिषदेच्या नगराध्यक्षाच्या आरक्षणाची सोडत झाली आहे. यामुळे आता राजकीय पक्षांकडून मोर्चे बांधणी सुरू झाली आहे. मात्र सत्ताधारी महायुतीत आता जागा वाटपाच्या आधीच स्थानिकपातळीवर डोकेदुखी पाहायला मिळत आहे. विविध जिल्ह्यात महायुतीतील तिन्ही मित्र पक्ष स्वबळाची चाचपणी करताना दिसत आहेत. तर थेट काही ठिकाणी स्थानिक नेते स्वळाचा नारा देताना दिसत आहेत. असेच संकेत अजित पवार यांच्या राष्ट्रवादीचे आमदार अनिल पाटील यांनी स्थानिक स्वराज्य संस्थांच्या निवडणुकीबाबत जळगावमध्ये दिले आहेत. त्यांच्या या संकेतामुळे आता महायुतीची अडचणीत भर पडली आहे.

राज्यात होणाऱ्या स्थानिक स्वराज्य संस्थांच्या निवडणुकीच्या पार्श्वभूमीवर महायुती आणि महाविकास आघाडीमधील घटक पक्षांनी कंबर कसली आहे. आपआपल्या स्तरावर मोर्चे बांधणीसह राजकीय तयारी सुरू झाली असून महायुतीतील भाजपसह राष्ट्रवादी बैठकीतून अंदाज बांधताना दिसत आहेत.

तर एकनाथ शिंदे यांनी शिवसेनेतील नेत्यांसह पदाधिकारी आणि कार्यकर्त्यांना कामाला लागण्याचे आदेश दिले आहेत. पण अद्याप महायुती असो किंवा महाविकास आघाडी यांच्यात जागा वाटपाबाबत कोणतीच चर्चा होताना दिसत नाही. तर आगामी स्थानिक महायुती किंवा महाविकास आघाडी म्हणून लढवल्या जाणार की स्वबळावर? याबाबतही चित्रही स्पष्ट झालेलं नाही.

अशातच काही दिवसांपूर्वी राष्ट्रवादीचे ज्येष्ठ नेते प्रफुल्ल पटेल यांनी स्थानिक स्वराज्य संस्थांच्या निवडणुकीमध्ये स्वबळाचे संकते दिले होते. त्यामुळे राज्याच्या राजकारणात खळबळ उडाली होती. त्यांच्या वक्तव्याची जोरदार चर्चा झाली होती. यानंतर आता पुन्हा एकदा राष्ट्रवादीने स्वबळाचे संकते दिल्याची चर्चा सुरू झाली असून राष्ट्रवादीचे आमदार अनिल पाटील यांचे वक्तव्य याला कारणीभूत ठरले आहे.

पाटील यांनी देखील स्थानिक स्वराज्य संस्थांच्या निवडणुकीबाबत मोठं वक्तव्य केलं आहे. त्यांनी जळगाव जिल्ह्यात महायुती झाली तर ठीक, नाहीतर आगामी जिल्हा परिषद, नगरपालिकांच्या निवडणुकांमध्ये राष्ट्रवादी देखील आपली ताकद दाखवणार असे म्हटलं आहे.

तसेच ते पुढे म्हणाले की, विधानसभा, लोकसभेच्या निवडणुकीत आमच्या कार्यकर्त्यांनी महायुती म्हणून आमचा प्रचार केला. आता त्याच कार्यकर्त्यांविरोधात स्थानिकमध्ये आम्ही प्रचार करावा का? हे न शोभणारे आहे. महायुतीतील सर्व कार्यकर्त्यांना सांभाळणं ही प्रत्येक पक्षाच्या नेत्याची आता जबाबदारी आहे. त्यामुळे युती झाली तर ठीक, नाही तर आम्ही सुद्धा जिल्हा परिषद, नगरपालिकांच्या सर्व जागा लढवू आणि आमच्या क्षमतेनुसार आमची ताकद दाखवू. अनिल पाटील यांनी केलेल्या वक्तव्यामुळे आता राजकीय वर्तुळात चर्चेला उधाण आलं आहे.

FAQs :

प्र.1: अनिल पाटील यांनी काय वक्तव्य केलं?
👉 त्यांनी महायुती जमली नाही तर राष्ट्रवादी स्वबळावर निवडणुका लढवेल असं म्हटलं.

प्र.2: हे वक्तव्य कुठे करण्यात आलं?
👉 जळगाव येथे स्थानिक स्वराज्य संस्थांच्या निवडणुकीबाबत बोलताना.

प्र.3: या वक्तव्यामुळे काय प्रतिक्रिया उमटल्या?
👉 महायुतीत तणाव निर्माण झाला असून राजकीय चर्चेला उधाण आलं.

प्र.4: अनिल पाटील कोणत्या पक्षाचे आहेत?
👉 ते राष्ट्रवादी काँग्रेस पक्षाचे आमदार आहेत.

प्र.5: राष्ट्रवादी स्वबळावर लढण्याची शक्यता आहे का?
👉 अनिल पाटील यांच्या वक्तव्यावरून ती शक्यता नाकारता येत नाही.