Local Body Election : मोठी बातमी! महाविकास आघाडीला राज ठाकरेंची साथ! शरद पवारांसोबत निवडणूक अधिकाऱ्यांना भेटणार

MVA politics : आगामी महापालिका, स्थानिक स्वराज संस्था निवडणुकीच्या पार्श्वभूमीवर सर्वपक्षीय मंडळ राज्याचे मुख्य निवडणूक अधिकारी चोकलिंगम यांना भेटणार आहेत. मुख्य निवडणूक अधिकाऱ्यांसोबत बैठक देखील होणार आहे. या सर्वपक्षीय शिष्टमंडळात राष्ट्रवादी काँग्रेस शरदचंद्र पवार पक्षाचे अध्यक्ष शरद पवार, शिवसेना उद्धव बाळासाहे ठाकरे पक्षाचे पक्षप्रमुख उद्धव ठाकरे, काँग्रेस प्रदेशध्याक्ष हर्षवर्धन सपकाळ आणि मनसे प्रमुख राज ठाकरे हे देखील सहभागी होणार आहेत. याविषयी माहिती संजय राऊत यांनी दिली आहे.

संजय राऊत म्हणाले की, निवडणूक आयोगाला भेटणे ही आता एक औपचारिकता आहे तरीही लोकशाही व्यवस्थेतील या सर्वोच्च संस्थेशी संवाद ठेवायला हवा. 14 ऑक्टोबरला 12.30 वाजता राज्यातील सर्व पक्षीय नेत्यांचे शिष्टमंडळ मुख्य निवडणूक अधिकारी श्री चोकलिंगम यांची भेट घेणार आहेत.

संजय राऊत यांनी फडणवीस यांना देखील पत्र लिहून शिष्टमंडळात सहभागी होण्याची विनंती केली आहे. त्यांनी म्हटले आहे की, शरद पवार,उद्धव ठाकरे, हर्षवर्धन सपकाळ,आणि राज ठाकरे यांच्यासह प्रमुख नेते बैठकीत सहभागी होणार आहेत. राज्याचे मुख्यमंत्री देवेंद्र फडणवीस यांनी या सर्वपक्षीय शिष्टमंडळात सहभागी व्हावे.

लोकशाही वाचवण्याचे प्रयत्न

हे राजकारण नाही तर लोकशाही वाचवण्याचा प्रयत्न आहे.भेटी नंतर यशवंतराव चव्हाण प्रतिष्ठान मध्ये सर्व नेत्यांची पत्रकार परिषद होईल, असे देखील राऊत यांनी सांगितले. तसेच आगामी महापालिका, स्थानिक स्वराज संस्थांच्या अत्यंत महत्वाच्या असलेल्या या निवडणुकांच्या यंत्रणेवर आणि प्रक्रियेवर कोणताही संशय राहू नये. निवडणूक पारदर्शक, निष्पक्ष पद्धतीने संविधानाचे पूर्ण पालन करून व्हाव्यात ही राज्यातील प्रमुख राजकीय पक्षांची भूमिका आहे.