Narhari Zirwal : अजितदादा की पवारसाहेब, नरहरी झिरवाळ यांनी स्पष्टच सांगितले

Narhari zirwal News : अजित पवार गटात असलेले आमदार नरहरी झिरवाळ यांचे पुत्र गोकुळ झिरवळ यांनी ते मी महाविकास आघाडीत आणि पवारसाहेबांच्या राष्ट्रवादीत आहे, असे म्हटले होते. आपली छाती फाडली तरी शरद पवार साहेबच दिसतील, असे गोकुळ म्हणाले होते. त्यामुळे नरहरी झिरवळ अजित पवारांची साथ सोडणार असल्याच्या चर्चा होत्या.

या चर्चांवर आज (सोमवारी) नरहरी झिरवाळ यांनी अजितदादा की पवारसाहेब याचे स्पष्ट उत्तर देऊन टाकले आहे. तसेच गोकुळचा बाप मी आहे. गोकुळ माझा बाप नाही, असे सांगत गोकुळ माझे ऐकेल, असे स्पष्ट केले.

'पहिल्यांदा ज्या पक्षात गेलो, आताही त्या पक्षात आहे. भविष्यातही तिथेच राहणार आहे. मी शेवटपर्यंत अजितदादांसोबत राहणार आहे', या शब्दांत नरहरी झिरवळ यांनी ते अजित पवार यांच्यासोबत राहणार असल्याचे स्पष्ट केले. अजित पवार गटाचे प्रदेशाध्यक्ष सुनील तटकरे यांनी देखील नरहरी झिरवाळ यांची बाजु घेत ते अजितदादांसोबतच आहेत, असे ठासून सांगितले.

जनतेचे मन जिंकलं

नरहरी झिरवाळ म्हणाले, मी जमिनीवर राहून जनतेच मनं जिकलं. गोकुळला देखील मी हेच सांगतो की त्याने हे काम करावं. मी जनतेचा अज्ञाधारक आहे. गोकुळ माझा अज्ञाधारक आहे. तो मला डावलून कसा जाईल? असे म्हणत नरहरी झिरवाळ यांनी गोकुळ आपल्यासोबत राहिल असा विश्वास व्यक्त केला.

बाप विरुद्ध मुलगा लढत?

दिंडोरी मतदारसंघाचे नेतृत्व नरहरी झिरवाळ करत आहेत. ते अजित पवार गटात आहेत. त्यांचे पुत्र गोकुळ झिरवळ यांनी ते शरद पवार गटात असल्याचे सांगितले आहे. आगामी विधानसभा निवडणूक लढण्यास इच्छुक असल्याचे देखील गोकुळ यांनी सांगितले आहे. त्यामुळे जर गोकुळ यांचे मन वळवण्यात नरहरी झिरवाळ अयशस्वी ठरले तर या मतदारसंघात बाप विरुद्ध पुत्र अशी लढत होण्याची शक्यता नाकारता येत नाही.