Kishore Patil Politics: शिंदेंच्या आमदाराने देवा भाऊंच्या आमदारांना हिणवले, "मंगेश चव्हाण उन्मेशदादांची थैली घेऊन फिरत होते"

Kishore Patil News: नगरपालिका निवडणुकीत महायुतीतील घटक पक्षच एकमेकांना आव्हान देत आहेत. यामध्ये पाचोरा आणि भडगाव नगरपालिका वादाचे केंद्र बनले आहे. एकमेकांवर टीका करताना प्रतिस्पर्ध्यांना जिव्हारी लागणारी टीका येथे सुरू आहे.

शिवसेना एकनाथ शिंदे पक्षाचे आमदार किशोर पाटील यांनी भाजपला महिन्याभरापूर्वी आव्हान दिले. पाचोरा आणि भडगाव येथे स्वबळावर निवडणुकीची घोषणा त्यांनी केली. भाजप हा विश्वासू पक्ष नाही असा त्यांचा दावा होता.

महायुतीचे ऐक्य धोक्यात यावे अशी स्थिती सध्या पाचोरा आणि भडगाव नगरपालिकेत निर्माण झाली आहे. कोणी बाजूंकडून अत्यंत शिलक या शब्दांचा मारा सुरू आहे. त्यामध्ये भाजपचे मंगेश चव्हाण यांच्यावर पुन्हा एकदा राजकीय हल्ला झाला.

भाजपचे आमदार चव्हाण यांनी शिवसेना एकनाथ शिंदे पक्षाला दिवसण्याची कोणतीही संधी सोडली नाही. आमदार किशोर पाटील यांना एकही जागा मिळणार नाही. नगरपालिका निवडणुकीत त्यांचा पराभव अटळ आहे, असा दावा आमदार चव्हाण यांनी केला होता.

आमदार चव्हाण यांच्या या टीकेला किशोर पाटील यांनी वेळ न दवडता उत्तर दिले आहे. आमदार मंगेश चव्हाण यांचा पगार किती? ते बोलतात किती? आणि ते माझा पगार काढत फिरत आहे. माझा पगार बघायचा असेल तर माझ्यासोबत असलेली जनता हाच माझा पगार आहे या शब्दात किशोर पाटील बरसले.

एकेरीवर येत आमदार पाटील यांनी, मंगेश चव्हाण यांना कोण ओळखायचे?. सहा वर्ष ते उन्मेशदादांची थैली घेऊन फिरत होते. अपघाताने अनेक पीए आमदार झाले. त्यात चव्हाण आहेत, असे आमदार पाटील म्हणाले.

पाचोरा आणि भडगाव दोन्ही नगरपालिकांचे नगराध्यक्ष शिवसेना शिंदे पक्षाचेच होतील, असा दावा पाटील यांनी केला. या दोन्ही नगरपालिकांवर शिवसेनेचा भगवा फडकेल. सर्वच्या सर्व जागांवर आमचे उमेदवार विजयी होतील. जनता आमच्या पाठीशी आहे, असे उत्तर पाटील यांनी दिले.

पाचोरा आणि भडगाव नगरपालिका आता जळगाव जिल्ह्याच्या राजकारणात केंद्रबिंदू बनल्या आहेत. जलसंपदा मंत्री गिरीश महाजन यांनी येथे विशेष लक्ष घातले आहे. मंत्री महाजन यांच्या विश्वासू मंगेश चव्हाण यांच्यावर ही जबाबदारी सोपविण्यात आली आहे. त्यामुळे रोजच शिवसेना एकनाथ शिंदे पक्ष आणि भाजप परस्परांवर शरसंधान करीत आहे.

----------