Vote Chori : नाशिकमध्ये वोट चोरी? “एक कोटीत 11,250 मते!” भाजप नेत्याचा ईव्हीएम सेटिंगचा स्फोटक दावा!

Nashik News : राज्यात सध्या वोट चोरी, भाजप आणि निवडणूक आयोग याबाबत गंभीर वाद सुरू आहेत. या वादाला गंभीर वळण देणारी घटना चांदवड येथे घडली असून भाजप नेत्याने केलेली आगळीक आता वादाचा विषय ठरली आहे.

चांदवड नगरपालिका निवडणुकीत भाजपने साम-दाम-दंड भेद सर्व प्रकारचा प्रयोग सुरू केला आहे. निवडणुकीच्या तोंडावरच काँग्रेसचे माजी आमदार शिरीष कोतवाल यांनी भाजप पक्षात प्रवेश करत या वादाला फोडणी देण्याचे काम केले आहे. यामुळे ही निवडणूक आधीच वादात सापडली होती.

अशातच आता भाजपचे नगराध्यक्ष पदाचे उमेदवार वैभव बागुल यांच्यासमोर नगराध्यक्ष पदाचे अपक्ष उमेदवार राकेश अहिरे यांनी कडवे आव्हान निर्माण केले आहे. पण आता भाजपचे नेते आणि सरकारी कंत्राटदार शक्ती ढोमसे यांच्या एका वक्तव्यामुळे नगराध्यक्ष पदाचे उमेदवारासह भाजपच अडचणीत येण्याची शक्यता आहे.

ढोमसे यांनी अहिरे यांना फोन करत आपण ईव्हीएम यंत्रामध्ये सेटिंग केल्याचे म्हटलं आहे. त्यांनी, आमची ईव्हीएम यंत्राबाबत सेटिंग झाली असून एक कोटी रुपयात अकरा हजार 250 मते आम्हाला मिळणार आहेत. त्यामुळे आमचा विजय निश्चित झाल्याचा दावा केला आहे. या दाव्यामुळे आता नाशिक जिल्ह्यात खळबळ उडाली आहे.

तसेच या घटनेतून भाजप नेत्यांकडून विरोधकांना नामोहरम करण्यासह भाजपच्या विरोधातील नगराध्यक्ष पदाच्या उमेदवारांनी निवडणुकीचा प्रचार थांबवावा, असा हेतू उघड झाला आहे. त्यामुळे अन्य उमेदवारांनी त्याचा धसका घेतला आहे. पण या प्रकारानंतर अहिरे चांगलेच संतापले असून त्यांनी याबाबत थेट पोलीस ठाणे गाठले आहे. पोलिसांनी त्यांची तक्रार देण्यास टाळाटाळ केल्याचेही आता समोर आले असून अहिरे आणि त्यांचे समर्थकांनी माघार घेतलेली नाही.

दरम्यान याबाबतची माहिती सोशल मीडिया तसेच इतर माध्यमातून चांदवडसह जिल्ह्याभर पोहोचल्याने आता भारतीय जनता पक्ष निवडणूक मॅनेज करत असल्याची चर्चा सुरू झाली आहे. त्यामुळे प्रतिस्पर्धी उमेदवारांमध्ये संतापाची लाट उसळली आहे. अहिरे आणि त्यांचे समर्थकांनी माघार न घेता लढण्याचा निर्धार केल्याने अखेर चांदवड पोलिसांना गुडघे टेकावे लागले आहे. पोलिसांनी भाजप नेत्याविरोधात तक्रार दाखल केली असून ढोमसे यांच्यावर गुन्हा दाखल करण्यात आला आहे. ढोमसे हे भाजप नेत्याचे भाऊ असून ते नगरपालिका निवडणूक प्रक्रियेतील मुख्य घटक आहेत.

देशभर आणि राज्यात निवडणूक आयोगाने मतदार याद्यांमध्ये मोठ्या प्रमाणावर गोंधळ केला आहे. हा गोंधळ विरोधकांनी गांभीर्याने घेतला आहे. विरोधात मोठ्या प्रमाणावर वातावरण तापले आहे. असताना भाजप नेत्याविरोधात थेट वोट चोरीचा गुन्हा दाखल झाल्याने तो चर्चेचा विषय ठरला आहे. या प्रकाराने सबंध राज्यभरातील नगरपालिका निवडणुकांमध्ये भाजप विषयी गैरसमज निर्माण होण्याची चिन्हे आहेत.

FAQs :

1) शक्ती ढोमसे यांनी नेमका काय दावा केला?

त्यांनी एक कोटी रुपयांत ईव्हीएम सेटिंग झाली असून 11,250 मते हमखास मिळतील, असा दावा उमेदवाराशी बोलताना केला.

2) हा दावा कसा समोर आला?

उमेदवाराशी झालेल्या संभाषणाचा व्हिडिओ समोर आल्याने हा मुद्दा चर्चेत आला.

3) पोलिसांनी कोणती कारवाई केली?

चांदवड पोलिसांनी भाजप नेते शक्ती ढोमसे यांच्याविरोधात तक्रार नोंदवली.

4) या प्रकरणाचा निवडणुकीवर काय परिणाम होऊ शकतो?

निवडणूक प्रक्रियेवर अविश्वास निर्माण होऊन राजकीय वातावरण अधिक तापू शकते.

5) भाजप अडचणीत का आला आहे?

दावा आणि तक्रार दोन्ही भाजप नेत्याशी संबंधित असल्याने मतदानाआधी राजकीय प्रतिमा धोक्यात आली आहे.