Pranjal Khewalkar Arrest : जावयाला अटक हा तर 'खडसेंचा आवाज दाबण्याचा प्रयत्न' ; सुषमा अंधारेंसह चव्हाण, राऊत महाजनांवर तुटुन पडले..

Maharashtra Politics : एकीकडे हनीट्रप प्रकरणावरुन एकनाथ खडसे व गिरीश महाजन यांच्यात वाद पेटला असतानाच खडसेंचे जावई व रोहिणी खडसे यांचे पती प्रांजल खेवलकर यांना पुण्यात महिलांसोबत रेव्ह पार्टी करताना रंगेहाथ पकडले गेले आहे. पोलिसांनी त्यांना अटक केली आहे. त्यामुळे मोठी खळबळ उडाली असून राजकीय वर्तुळातून विविध प्रतिक्रिया येऊ लागल्या आहेत.

दरम्यान यासंदर्भात महाविकास आघाडीच्या अनेक नेत्यांनी प्रतिक्रिया दिल्या आहेत. यासंदर्भात शिवसेना उद्धव बाळासाहे ठाकरे पक्षाच्या नेत्या सुषमा अंधारे, खासदार संजय राऊत यांच्यासह राष्ट्रवादी (शरचंद्र पवार) पक्षाच्या नेत्या विद्या चव्हाण यांच्या प्रतिक्रिया आल्या आहेत. हा यंत्रणांचा गैरवापर होत असल्याची ओरड त्यांनी केली आहे.

एकनाथ खडसेंनी गिरीश महाजन यांच्यावर काही आरोप केले आहेत. चार दिवसांपासून खडसे व महाजन यांच्यात शीतयुद्ध सुरु आहे. आणि बरोबर त्याचवेळेला त्यांच्या जावई प्रांजल खेवलकर यांच्यावर ही कारवाई झाली आहे. रेव्ह पार्टीचा बनाव करुन यातून खडसेंचा आवाज दाबण्याचा प्रयत्न केला जातोय. खडसे आणि खडसेंसारख्या बोलणाऱ्या अनेक लोकांसाठी यातून एक संदेश दिला गेला आहे..चुप बैठो नही तो रेड करुंगा असं सुषमा अंधारे यांनी म्हटलं आहे.

तर संजय राऊत म्हणाले, एकनाथ खडसे यांनी जे मुद्दे मांडले त्याची चौकशी होत नाही. पण जो आरोप करतो त्याच्या घरावर धाडी घातल्या जातात. ही पार्टी, ती पार्टी, मग तुमचं काय सुरु आहे. तुमचा संपूर्ण भारतीय जनता पार्टी ही एक रेव्ह पार्टी आहे अशी घणाघाती टीका राऊत यांनी केली आहे. याआधीही खडसेंच्या जावयाला ईडीने ताब्यात घेतलं होतं, पण त्यात काही मिळालेलं नाही असं राऊत म्हणाले.

राष्ट्रवादी (शरचंद्र पवार) पक्षाच्या नेत्या विद्या चव्हाण यांनी म्हटलं आहे की, गेल्या काही दिवसांपासून राष्ट्रवादी शरद पवार पक्षाच्या नेत्या रोहिणी खडसे आक्रमकपणे सरकारवर टीका करताना, विषय मांडताना दिसून येत आहेत. सत्ताधाऱ्यांविषयी कोणीही आता काही बोललं की त्यांना नाही पण त्यांच्या कुटुंबियांना त्रास देण्याची पद्धत सुरु झाली आहे, हा त्यातलाच प्रकार मला वाटतोय. रोहिणी ताई विरोधात बोलत आहेत ना तर त्यांचं तोंड कसं बंद करता येईल. त्यांची मुलं तर लहान आहेत. मग नवऱ्याला पकडता येईल का? अशा प्रकारे टार्गेट केलं जातंय. या सगळ्या प्रकाराला निश्चितीच राजकीय वास आहे असं विद्या चव्हाण यांनी म्हटलं आहे.