Eknath Khadse : महिलांबाबत गिरीश महाजन यांचं नाव कायम पुढे का येतं? खडसेंचा खळबळ उडवणारा सवाल

Girish Mahajan : राज्यात सध्या हनीट्रॅप प्रकरण गाजत आहे. याप्रकरणी जळगाव जिल्ह्यातील प्रफुल्ल लोढा यांच्यावर गुन्हा दाखल झाला असून ते मुंबई पोलिसांच्या अटकेत आहे. त्यावरुन एकनाथ खडसे व गिरीश महाजन यांच्यात आरोप-प्रत्यारोप सुरु आहे. आता खडसे यांनी गिरीश महाजन यांच्याबद्दल आणखी एक सवाल उपस्थित केला आहे.

काल भाजप आमदार मंगेश चव्हाण यांनी पत्रकारपरिषद घेत खडसेंवर गंभीर आरोप केले. एकनाथ खडसे यांचे अनेक महिलांशी संबंध होते. त्या महिला रात्र-रात्र यांच्याकडे येऊन राहायच्या. सकाळी लोकं त्यांना सोडायला जायचे. असा बघणारा व्यक्ती सांगत होता, असा आरोप चव्हाण यांनी खडसे यांच्यावर केला होता.

त्या आरोपांवर खुलासा करण्यासाठी खडसेंनी शनिवारी पत्रकारपरिषद घेतली. यावेळी चव्हाण यांच्या आरोपांना प्रत्युत्तर देताना खडसे यांनी पुन्हा महाजन यांच्यावर निशाणा साधला. खडसे म्हणाले मला आमदारांवर बोलायचे नाही. मूळ प्रश्न गिरीश महाजनांचा आहे. महिलांबाबत गिरीश महाजन यांचं नाव कायम पुढे का येतं? हा माझ्यासमोर मूळ प्रश्न असल्याचं खडसे म्हणाले.

मी गिरीश महाजनांचे नाव घेतच नाही. पहिल्यांदा प्रफुल्ल लोढा याने गिरीश महाजन यांच्याबाबत म्हटलं की, यांचे सर्व पुरावे माझ्याकडे आहे. मी एक बटण दाबलं तर सगळ्या हिंदुस्थानात खळबळ उडेल. हे लोढांचे शब्द आहेत. माझे नाही. मग प्रफुल्ल लोढाने गिरीश महाजन यांचेच का नाव घेतले. याआधीही गिरीश महाजन यांचे एका महिला आयएएस अधिकाऱ्याशी संबंध असल्याचा आरोप पत्रकार असलेल्या अनिल थत्ते यांनी केला होता. मग त्यांनाही गिरीश महाजन यांचच नाव त्या महिला आएएएस अधिकाऱ्याशी का जोडावं वाटलं?

तिसरं महत्वाचं हे की, महाराष्ट्राच्या विधानसभेत अजित पवारांनी गिरीश महाजन यांना म्हटलं होतं की, काका बसा गुपचूप, नाहीतर मला काकीला सांगावं लागेल, तुमच्या मागे किती काकी आहेत. मग हे किती काकी आहेत? असं अजित दादांनी म्हटलं होतं. गिरीश भाऊच्या काकी शिवाय आणखी किती काकी आहेत मग त्यांनी असं का म्हटलं. मग उद्या अजित पवार म्हणतील पुरावा द्या. पुरावा द्यायची गरज नाही तुम्ही स्वत:च बोलले आहेत. त्यामुळे पुरावे तुम्हीच शोधायचे, प्रफुल्ल लोढा तुमच्या ताब्यात आहेत. माझ्या नाही.

सरकार प्रफुल्ल लोढाकडून माहिती काढण्याचा प्रयत्न करत आहे. पण, त्यात जर काही मंत्र्याची प्रकरणं असतील तर ते बाहेर येण्याची शक्यता नाहीच. सरकार हे प्रकरण दडपण्याचे प्रयत्न करत आहे. प्रफुल्ल लोढाची नार्को टेस्ट करा 'दूध का दूध पाणी का पाणी' होईल अशी मागणी खडसेंनी केली.

दरम्यान आमदार मंगेश चव्हाण यांनी केलेल्या आरोपांवर खडसे म्हणाले, मी चव्हाण यांना आव्हान करतो की, तुमच्याकडे माझ्यासंदर्भात एक छोटी गोष्ट देखील पुरावा म्हणून असेल तर ती समजासमोर दाखवा. जर तुम्ही पुरावा दिला तर मी सक्रिय राजकारणातून संन्यास घेईल असं आव्हान खडसेंनी दिलं.