Jalgaon DCC Bank Election : निवडणुकीच्या मैदानात समोरासमोर भिडू, मंत्री रक्षा खडसे यांचे आमदार चंद्रकांत पाटील यांना आव्हान

Jalgaon DCC Bank Election : जळगाव जिल्हा बॅंकेच्या आगामी निवडणुकीच्या पार्श्वभूमीवर सध्या भाजप नेत्या तथा मंत्री रक्षा खडसे व मुक्ताईनगरचे शिवसेना आमदार चंद्रकांत पाटील यांच्यात वादाचा कलगीतुरा रंगला आहे. चंद्रकांत पाटील यांनी खडसेमुक्त जिल्हा बॅंक करण्याचा आपला प्रयत्न सुरु असल्याचे सांगत खडसे परिवारावर घराणेशाहीचा आरोप केला होता. रक्षा खडसे यांनी आता पाटील यांनी केलेल्या टीकेचा खरपूस समाचार घेतला आहे.

निवडणुकीवरून लक्ष्य करणाऱ्या आमदार चंद्रकांत पाटील यांना रक्षा खडसे यांनी चांगलेच सुनावले आहे. आधी दुष्काळग्रस्त शेतकऱ्यांची चिंता करा, निवडणुकीच्या मैदानात समोरासमोर भिडूच," असा इशारा रक्षा खडसेंनी चंद्रकांत पाटील यांना दिला. त्या जळगावात आयोजित पत्रकारपरिषदेत बोलत होत्या.

जिल्ह्यावर आज दुष्काळाचे भीषण संकट आहे. शेतकऱ्यांचे प्रश्न आ वासून उभे असताना लोकप्रतिनिधी म्हणून आमदारांनी निवडणुकीची चिंता न करता आधी शेतकऱ्यांच्या बांधावर जायला हवे. निवडणुका डिसेंबरमध्ये आहेत, तेव्हा आम्ही समोरासमोर भिडूच. जिल्हा बॅंक 'खडसेमुक्त' करायची की नाही याचा निर्णय मतदार घेतील, चंद्रकांत पाटील भाजपचे सर्वेसर्वा नाहीत अशा शब्दात रक्षा खडसेंनी आमदार पाटील यांच्या वक्तव्याचा समाचार घेतला.

चंद्रकांत पाटलांच्या राजकारणाचा पायाच खडसे विरोधावर आधारलेला आहे. आमच्यावर खालच्या पातळीवर जाऊन घराणेशाहीचे आरोप करणाऱ्यांनी आधी स्वतःच्या घरात डोकावून पाहावे. मुक्ताईनगर पालिकेत स्वतःच्या मुलीला नगराध्यक्ष करून तिथे काय कारभार केला, हे जनतेला ठाऊक असल्याचे रक्षा खडसे म्हणाल्या.

तीन ठिकाणी ठराव करण्यावरून झालेल्या टीकेला उत्तर देताना त्या म्हणाल्या, "कोथळीत माझे घर आहे, घोडसगावला शेती आहे, तर कर्की येथे नातेवाईक असून तिथल्या स्थानिक लोकांनी आग्रहाने ठराव केला आहे. मी पदाचा कोणताही गैरवापर केलेला नाही. स्वतः मंत्रिपदावर नसतानाही यंत्रणेवर दबाव आणणाऱ्यांनी आम्हाला नैतिकता शिकवू नये. आधी आपण काय बोलतो आणि काय करतो याचे आत्मचिंतन करावे," असा खणखणीत टोला रक्षा खडसेंनी आमदार पाटलांना लगावला.