Jalgaon crime : केंद्रीय मंत्री रक्षा खडसेंच्या पेट्रोलपंपावर दरोडा, कर्मचाऱ्यांना मारहाण करत लाखोंची लूट

Raksha Khadse : केंद्रीय मंत्री रक्षा खडसे यांच्या मुक्ताईनगर येथील पेट्रोल पंपावर दरोडा पडल्याची धक्कादायक घटना समोर आली आहे. मुक्ताईनगर तालुक्यातील करकी गावाजवळील पंपावर हा दरोडा पडला आहे. पंपावरील कर्मचाऱ्यांना मारहाण करत व बंदुकीचा धाक दाखवत १ लाख रुपयांची रोकड दरोडेखोरांनी पळवली.

मिळालेल्या माहितीनुसार, जळगावमध्ये मुक्ताईनगर येते मुंबई-नागपूर महामार्गावरील तीन पेट्रोल पंपावर हा दरोडा पडला आहे. यात केंद्रीय मंत्री रक्षा खडसेंच्या मालकीच्या पेट्रोलपंपावरही दरोडा टाकण्यात आला. या घटनेमुळे परिसरात मोठी खळबळ उडाली. दरम्यान दरोडे खोरांचा पोलिसांनी सिनेस्टाईल पाठलाग करत पाच पैकी तीन संशयितांना ताब्यात घेतल्याची माहिती आहे.

नेमकं काय घडलं?

मुक्ताईनगरच्या राष्ट्रीय महामार्ग 6 वरील रक्षा ऑटो फुएल्स या पेट्रोल पंपावर बुधवारी पहाटेच्या सुमारास ही घटना घडली. पाच दरोडेखोर मोटरसायकलवरून आले. यावेळी या दरोडेखोरांनी पंपावरील कर्मचाऱ्यांना बंदुकीचा धाक दाखवत दहशत निर्माण केली. सुमारे एक लाख रुपयांची रोकड त्यांनी लुटली.

दरोडे खोरांकडून करण्यात आलेल्या मारहाणीत एक कर्मचारी जखमी झाल्याची माहिती आहे. तसेच दरोडेखोरांनी जाताना पट्रोल पंपावर लावलेल्या सीसीटीव्हींची तोडफोड केली. पेट्रोल पंपातील ऑफिसमध्ये असलेल्या कॉम्प्युटर, प्रिंटरची देखील तोडफोड केली.

या घटनेची माहिती मिळताच नागरिकांनी घटनास्थळी मोठी गर्दी केली होती. पोलिसांनी रात्रीच जिल्ह्यात नाकाबंदी केली. या दरोड्यामध्ये पाच आरोपींचा समावेश होता. यामधील तीन संशयीतांना पोलिसांना ताब्यात घेतलं असून दोघा फरारींचा शोध सुरु आहे. सध्या पोलीस ताब्यात घेतलेल्या आरोपींची कसून चौकशी करत आहेत.

दरम्यान थेट केंद्रीय राज्यमंत्री असलेल्या रक्षा खडसे यांच्या पंपावर दरोडा पडल्याने परिसरात तणावाची परिस्थिती निर्माण झाली होती. पोलिसांनी तत्काळ दखल घेतली असून पोलीस अधीक्षक स्वतः या तपासावर लक्ष ठेवून आहेत. उर्वरित फरार झालेल्या दोन संशयितांना पकडण्यासाठी पोलिसांची पथके विविध ठिकाणी रवाना झाली आहेत.