Chhagan Bhujbal : रोहित पवारांच्या 'त्या' विधानावर छगन भुजबळांची फटकेबाजी; 'तिरकस' प्रश्नाने राष्ट्रवादीतील संघर्ष पेटणार?

Bhujbal slams Rohit Pawar over remarks: दोन्ही राष्ट्रवादीच्या विलीनीकरणाचा वाद रोज नवी वळणे घेत आहे. यावर मंत्री छगन भुजबळ यांनीही नवे वक्तव्य केले आहे. विलीनीकरणाला अप्रत्यक्षरीत्या त्यांनी विरोध दर्शवत. राष्ट्रवादी काँग्रेस शरदचंद्र पवार पक्षाचे नेते रोहित पवार यांनी विलीनीकरणाबाबत वक्तव्य केले होते. वक्तव्यावर अन्न व नागरी पुरवठा मंत्री छगन भुजबळ यांनी टीका केली आहे. विलीनीकरणाबाबत कोणतीही चर्चा आपल्याला माहित नाही असे ते म्हणाले.

राष्ट्रवादी काँग्रेसचे विलीनीकरण हा मुद्दा सध्या दोन्ही गटाच्या नेत्यांमध्ये वादाचा विषय बनला आहे. खासदार डॉ अमोल कोल्हे हे विलीनीकरणानंतर प्रदेशाध्यक्ष होणार होते, असे वक्तव्य रोहित पवार यांनी केले होते. त्यावर छगन भुजबळ यांनी रोहित पवार यांना टोला लगावला.

दिवंगत नेते अजित पवार यांनी राष्ट्रवादी काँग्रेसचे विलेनीकरण याबाबत निर्णय घेतला होता. विलीनीकरणानंतर काही महत्त्वाचे बदल ते करणार होते. त्यामध्ये प्रदेशाध्यक्ष पदासाठी खासदार डॉ कोल्हे यांच्या नावाचा प्रस्ताव होता. विविध बैठकांना त्यामुळेच डॉ कोल्हे उपस्थित होते, असा दावा रोहित पवार यांनी केला होता.

राष्ट्रवादी काँग्रेसच्या विलीनीकरणाबाबत दिवंगत नेते अजित पवार यांनी बहुतांशी निर्णय घेतले होते, असे रोहित पवार म्हणतात. मात्र आम्हाला याबाबत कोणतीही माहिती नाही. अजित दादांनी देखील काहीही सांगितले नव्हते, असे भुजबळ म्हणाले. दोन्ही पक्षांचे विलीनीकरण होणार असते तर आम्हाला त्याची माहिती नक्कीच कळली असती. मात्र तसे काहीही झाल्याचे दिसत नाही. विलीनीकरण होण्याआधीच रोहित पवार यांनी बहुतांशी निर्णय आणि पदांचे वाटप केले की काय? असा प्रश्न त्यांनी केला.

राष्ट्रवादी काँग्रेसच्या विलीनीकरण आधीच कोणकोणत्या पदावर नियुक्त होईल? हे देखील रोहित पवार यांनी ठरवले होते. प्रदेश आणि राष्ट्रीय अध्यक्ष कोण? हे ठरवले. असे असेल तर उपमुख्यमंत्री कोणाला करायचे हेही ठरवले होते का? असा टोमणा भुजबळ यांनी लगावला. भुजबळ यांनी रोहित पवार यांच्या वक्तव्याची खिल्ली उडवली. उपमुख्यमंत्री सुनेत्रा पवार या आमच्या पक्षाच्या नेत्या आहेत. पक्षाच्या भूमिकेबाबत त्याच मुख्य निर्णय घेतील, असेही भुजबळ म्हणाले.

आमदार रोहित पवार यांनी विलीनीकरणासह उपमुख्यमंत्री अजित पवार यांच्या विमान अपघाताबाबत सातत्याने विविध विधाने केली आहेत. त्यामुळे राष्ट्रवादी काँग्रेसच्या अजित पवार गटाच्या नेत्यांमध्ये यावरून मतभिन्नता वारंवार पुढे आली आहे. मंत्री भुजबळ यांचा देखील या निर्णयाला विरोध असल्याचे आता अधोरेखित झाले आहे.