Ahilyanagar News : बाळासाहेब थोरातांच्या भावासह 9 ते 10 जणांची गुंडगिरी; थेट पंचायत समितीत घुसून कर्मचाऱ्याला बेदम मारहाण

Ahilyanagar News, 24 Mar : काँग्रेस नेते तथा माजी मंत्री बाळासाहेब थोरात यांचे चुलत बंधू शरद नाना थोरात यांच्यासह 9 ते 10 जणांनी अहिल्यानगर जिल्ह्यातील संगमनेर येथील पंचायत समिती कार्यालयातील एका कर्मचाऱ्याला बेदम मारहाण केल्याची घटना समोर आली आहे.

या मारहाणीच्या घटनेमुळे एकच खळबळ उडाली आहे. तालुका अभियान व्यवस्थापकावर कार्यालयात घुसून मारहाण केल्याच्या घटनेचा व्हिडिओ सोशल मीडियावर व्हायरल झाल्याने कायदा आणि सुव्यवस्थेचा प्रश्न उपस्थित केला जात आहे.

मिळालेल्या माहितीनुसार, बाळासाहेब थोरातांच्या चुलत भावासह काही लोकांनी थेट संगमनेर पंचायत समिती कार्यालयात जात संबंधित अधिकाऱ्याला मारहाण करायला सुरूवात केली. या मारहाणीत कर्मचाऱ्याला गंभीर दुखापत झाली असून, यावेळी कार्यालयात एकच गोंधळ उडाल्याचं व्हिडिओत दिसत आहे.

दरम्यान, या मारहाण प्रकरणी रात्री उशिरा संगमनेर शहर पोलीस ठाण्यात गुन्हा दाखल करण्यात आला आहे. बाळासाहेब थोरात यांचे चुलत बंधू शरद नाना थोरात यांच्यासह 9 ते 10 जणांविरोधात हा गुन्हा नोंदवण्यात आला आहे.

तर या मारहाणीमागे नेमकं काय कारण आहे हे समोर आलं नसलं तरी शासकीय कामात अडथळा आणणे, मारहाण करणे यांसारख्या गंभीर कलमांखाली गुन्हा दाखल करण्यात आला आहे. मात्र, सरकारी कार्यालयात घुसून कर्मचाऱ्याला मारहाण केल्याने कर्मचाऱ्यांकडून संताप व्यक्त केला जात आहे.