Dilip Borse Politics: भाजपच्या आमदार दिलीप बोरसे यांची स्थिती "गड आला पण सिंह गेला", राहुल पाटील ठरले वरचढ!

Satana Municipality News: सटाणा नगरपालिका निवडणुकीत भाजपला अनपेक्षित धक्का बसला. आमदार दिलीप बोरसे यांना नगराध्यक्ष पदाने हुलकावणी दिली. त्यामुळे हा निकाल भाजपसाठी धक्का देणारा ठरला.

सटाणा नगरपालिका निवडणुकीत २४ जागांपैकी १५ जागा भाजपने पटकावल्या. आमदार दिलीप बोरसे यांच्या विरोधात शिवसेना एकनाथ शिंदे पक्षाच्या राहुल पाटील यांनी आव्हान उभे केले होते. त्यात शिवसेना एकनाथ शिंदे पक्ष वरचढ ठरला.

सटाणा नगरपालिका निवडणुकीत यंदा मोठी चुरस होती. आमदार दिलीप बोरसे यांनी भाजप स्वबळावर निवडणूक लढविणार असे जाहीर केले होते. त्यांच्या विरोधात शिवसेना एकनाथ शिंदे पक्षासह राष्ट्रवादी काँग्रेस अजित पवार पक्षानेही स्वतंत्रपणे उमेदवार दिले होते.

निवडणुकीत स्थानिक प्रश्न ऐरणीवर आले होते. विशेषता सार्वजनिक आरोग्य आणि वाढणारी घरपट्टी या प्रश्नावर सत्ताधाऱ्यांना विरोधकांनी चांगलेच कोंडीत पकडले. भाजपला अडचणीत आणण्यासाठी सर्व पक्षांनी विविध डावपेच आखले होते. त्यावर भाजपने मात केली.

शिवसेना एकनाथ शिंदे पक्षाच्या हर्षदा राहुल पाटील या विजयी झाल्या. त्यांना दहा हजार ३०७ मते मिळाली. त्यांनी भाजपच्या योगिता मोरे यांचा मोठ्या फरकाने पराभव केला. अपक्ष रूपाली कोठावदे यांच्या उमेदवारीचाही भाजपला फटका बसला.

आमदार बोरसे यांच्या भाजपच्या पॅनलला सर्वाधिक १५ जागा मिळाल्या. शिवसेना शिंदे पक्षाला चार तर राष्ट्रवादी काँग्रेस अजित पवार पक्षाला अवघी एक जागा मिळाली. जागांवर अपक्ष उमेदवार निवडून आले. भाजपला बहुमत मिळूनही नगराध्यक्ष पदाने हुलकावणी दिली. त्यामुळे आमदार बोरसे यांची स्थिती "गड आला पण सिंह गेला" अशी झाली.

भाजपचे विजयी उमेदवार असे, सुनंदा देवरे, मुल्ला रऊफ खलील शाह, लताबाई बच्छाव, मनीषा पोकळे, विलास दंडगव्हाळ, हर्षवर्धन सोनवणे, चेतन मोरे, प्रतिभा खैरनार, सोनाली बेताडे, महेश सोनवणे, चेतन रौंदळ, सुमित वाघ आणि सीमा सोनवणे.

अन्य विजयी उमेदवारांमध्ये मनीष जयवंत पवार, कल्पना सोनवणे अलका बोरसे आणि मंगेश विजय खैरनार हे अपक्ष आहेत. राष्ट्रवादी काँग्रेस अजित पवार पक्षाचे झुमेरा यासीन शेख आणि शिवसेना शिंदे पक्षाचे जयश्री गरुड, भूषण सोनवणे, तनुजा नांद्रे आणि राहुल पाटील यांचा समावेश आहे.

---------