Shahada Tehsildar News: तहसीलदारांच्या पत्नीचा अजब कारनामा! घरचा किराणा आणण्यासाठी वापरली सरकारी गाडी

सागर निकवाडे

नंदुरबार जिल्ह्यातील शहादा येथून प्रशासनाची प्रतिमा मलिन करणारी एक धक्कादायक घटना समोर आली आहे. सामान्य नागरिकांना नियमांचे धडे देणाऱ्या महसूल प्रशासनातील एका वरिष्ठ अधिकाऱ्यांच्या कुटुंबीयांकडूनच शासकीय सुविधांचा कथित गैरवापर झाल्याचा आरोप होत आहे. शहादाचे तहसीलदार संभाजी पाटील यांच्या पत्नीने घरगुती किराणा खरेदीसाठी थेट सरकारी वाहन आणि शासकीय चालकाचा वापर केल्याची चर्चा सध्या जिल्हाभर रंगली आहे.

शहादा शहरातील नवजीवन मार्ट परिसरात तहसील कार्यालयाची शासकीय गाडी (MH39AB7580) उभी असल्याचे दिसून आले. विशेष म्हणजे, या वाहनातून तहसीलदारांच्या पत्नी आपल्या लहान मुलांसह किराणा खरेदीसाठी आल्याचे सांगितले जात आहे. किराणा सामानाची वाहतूकही याच शासकीय वाहनातून करण्यात आल्याचा आरोप आहे, याबाबतचे वृत्त साम टीव्हीने दिले आहे.

या घटनेमुळे अनेक प्रश्न उपस्थित झाले आहेत. सरकारी वाहनांचा वापर हा केवळ शासकीय कामकाजासाठी करण्याचे स्पष्ट नियम असताना, वैयक्तिक कामासाठी वाहन आणि चालकाचा वापर होत असेल तर तो जनतेच्या पैशांवर डल्ला मारण्यासारखाच प्रकार असल्याची प्रतिक्रिया नागरिक व्यक्त करत आहेत. सामान्य नागरिकांनी एखादा नियम मोडला तर तत्काळ कारवाई होते, मग अधिकाऱ्यांसाठी वेगळे नियम आहेत का, असा सवालही उपस्थित केला जात आहे.

प्रशासनातील काही अधिकारी आणि कर्मचाऱ्यांना नियमांचा विसर पडला आहे का, अशी चर्चा आता सुरू झाली आहे. कारण सरकारी गाडी ही कोणत्याही अधिकाऱ्याची किंवा त्यांच्या कुटुंबीयांची खासगी मालमत्ता नसून ती जनतेच्या कराच्या पैशातून चालणारी सुविधा आहे. त्यामुळे अशा प्रकारांकडे दुर्लक्ष झाले तर चुकीचा संदेश समाजात जाण्याची शक्यता आहे.

या प्रकरणाची सखोल चौकशी करून वस्तुस्थिती समोर आणावी आणि गैरवापर झाल्याचे सिद्ध झाल्यास संबंधितांवर नियमांनुसार कारवाई करावी, अशी मागणी स्थानिक नागरिकांकडून केली जात आहे. आता जिल्हा प्रशासन आणि वरिष्ठ अधिकारी या प्रकरणाकडे किती गांभीर्याने पाहतात, याकडे सर्वांचे लक्ष लागले आहे.