Video Sharad Pawar : आता कोणाचा गेम होणार! लोकसभेनंतर शरद पवार पुन्हा नाशिकच्या मैदानात

Nashik Teachers Constituency : नाशिक विभाग शिक्षक निवडणुकीसाठी महाविकास आघाडीकडून संदीप गोपाळराव गुळवे उमेदवारी मिळाली आहे. त्यांच्या प्रचारासाठी राष्ट्रवादी शरदचंद्र पवार पक्षाचे अध्यक्ष शरद पवार मैदानात उतरले आहेत. यातच आता उत्तर महाराष्ट्रातील पाचही जिल्ह्यात सर्व शरद पवार समर्थक जोमाने कामाला लागल्याचे चित्र गेल्या आठवड्यापासून विभागातील सर्वच तालुक्यात दिसत आहे.

महाराष्ट्राच्या राजकारणात गेल्या पन्नास वर्षापासून शरद पवार महत्त्वाचे केंद्रबिंदु राहिले आहेत. राज्यातील सामाजिक आणि शैक्षणिक विभागात पवारांचा दांडगा जनसंपर्क आहे. त्यातच महाविकास आघाडीचे उमेदवार संदीप गुळवे यांच्यासाठी पवारांच्या समर्थकांनी दिलेली ताकद जमेची बाजू ठरणार आहे.

संदीप गुळवे यांचे वडील गोपाळराव गुळवे यांचा उत्तर महाराष्ट्राच्या राजकारणात महत्त्वाचे स्थान होते. शिवाय पवार (Sharad Pawar) आणि गुळवे यांच्या परिवाराचे दृढ संबंध राहिले आहेत ते आजही तसेच आहेच. त्यामुळे शिक्षण संस्था व शिक्षण नेत्यांची मोट बांधायला शरद पवार स्वतः मैदानात उतरले आहेत. ही बाब विरोधकांसाठी नक्कीच काळजी वाढवणारी ठरणार आहे.

काय म्हणाले शरद पवार

काँग्रेसचे दिवंगत नेते गोपाळराव गुळवे आणि माझे जिव्हाळ्याचे संबंध होते. नाशिक (Nashik) शिक्षकांसाठी त्यांचे सुपुत्र संदीप गुळवे महाविकास आघाडीकडून उमेदवारी करत आहेत. आज गोपाळराव हयात नसले तरी संदीप यांनी तोच जिव्हाळा कायम राखला आहे. त्यांच्या प्रचारात सर्व झोकून काम करत आहेत. मला खात्री आहे पाचही जिल्ह्यात शिक्षकांचे प्रलंबित प्रश्न गुळवे हे त्यांच्यातील अभ्यासू वृत्तीने सभागृहात मांडून मार्गी लागतील.