Maharashtra Politics : एकनाथ खडसेंनी अचूक टायमिंग साधलं, शिंदेंच्या आमदाराच्या 'त्या' वक्तव्याचं समर्थन करत थेट CM फडणवीसांवर हल्लाबोल

Jalgaon News, 04 Nov : उपमुख्यमंत्री एकनाथ शिंदेंच्या शिवसेनेचे आमदार किशोर पाटील यांनी महायुती सरकारवर तोफ डागली होती. राज्य सरकारच्या फसव्या कारभारावर त्यांनी टीका केली. त्यामुळे महायुती सरकारला त्यांच्याच आमदाराकडून घरचा आहेर मिळाला.

आमदार किशोर पाटील यांनी टीका केली होती. त्याला माजी मंत्री एकनाथ खडसे यांनीही दुजोरा दिला आहे. किशोर पाटील यांचे काय घेऊन बसलात, राज्यातील एकालाही आमदार निधी मिळालेला नाही, असा दावा खडसेंनी केला आहे.

राज्यातील शेतकरी मोठ्या संकटात सापडला आहे. याबाबत सर्व विरोधी पक्ष आणि शेतकरी सरकारकडे आस लावून बसले आहेत. मात्र मुख्यमंत्री देवेंद्र फडणवीस यांनी केवळ घोषणा केली. शेतकऱ्यांना नुकतेच पॅकेज जाहीर करण्यात आले. या पॅकेजचा आणि राज्य सरकारचा काहीही संबंध नाही. जाहीर केलेल्या पॅकेज एनडीआरएफ योजनेतून केंद्र शासनाने जाहीर केले आहे. राज्य सरकार शेतकऱ्यांना मदत देऊ शकले नाही.

राज्यातील महायुती सरकार दिवाळखोर झाले आहे, असा हल्लाबोल माजी मंत्री खडसे यांनी केला. सरकार केवळ घोषणा करते. घोषणांच्या कार्यवाहीसाठी त्यांच्याकडे निधीच नाही. मी गेली 35 वर्षे आमदार आहे. अनेक सरकार आणि त्यांचे कामकाज पाहिले आहे. गेल्या 35 वर्षात पहिल्यांदाच आमदारांना त्यांचा हक्काचा आमदार निधी मिळालेल्या नाही. मात्र सत्ताधारी आमदार यावर गप्प आहेत.

राज्य शासनावर सार्वजनिक बांधकाम विभागाच्या कंत्राटदारांचे देणी थकविल्याचा गंभीर आरोप होत आहे. अनेक संस्थांनी हक्काचा निधी मिळालेला नाही अशी तक्रार केली आहे. लाडकी बहीण योजनेसाठी देखील आदिवासी विकास विभाग आणि अन्य योजनांचा पैसा वळविण्याचा आरोप होत आहे.

या पार्श्वभूमीवर माजी मंत्री एकनाथ खडसे यांनी सरकारचे चांगलेच वाभाडे काढले आहेत. सत्ताधारी पक्षांवर टीका करण्याची कोणती संधी खडसे सोडत नाहीत. अशातच आता शिंदेंच्या आमदाराच्या वक्तव्यामुळे त्यांच्या हाती आयते कोलीत मिळाले आहे. त्यामुळे त्यांनी आमदार किशोर पाटील यांच्या सुरात सूर मिसळत राज्य सरकारवर टीकास्र डागलं आहे.