Milk Adulteration: भेसळखोरांना अन्न व औषध प्रशासनाचा आशीर्वाद? सिन्नरमध्ये तब्बल 464 दूध संकलन केंद्रांची नोंदणीच नाही!

Nashik FDA News: दूध भेसळखोरांनी हजारो नागरिकांच्या जीविताशी खेळ सुरू केला आहे. एकट्या सिन्नर तालुक्यात 400 हून अधिक संस्था दूध संकलन करीत आहेत. याबाबत धक्कादायक माहिती पुढे आली आहे.

गेल्या आठवड्यात सिन्नर तालुक्यातील चार संकलन केंद्रांवर छापा पडला. अन्न व औषध प्रशासनाच्या या कारवाईत १७.३७ लाखांचे ८३९ किलो भेसळीसाठी वापरले जाणारे साहित्य आढळले. दिवसभर ही कारवाई सुरू होती.

सिन्नर पोलीस ठाण्यात या संदर्भात प्रशांत रोहिदास काळे यांच्या विरुद्ध गुन्हा दाखल करण्यात आला. मात्र या प्रकरणातील मुख्य सूत्रधार वेगळाच होता. गुन्हा दाखल झाल्यानंतर संशयित काळे आणि सूत्रधार दोघेही प्रसार झाले आहेत.

या संदर्भात दुसऱ्या कारवाईत अन्न व सुरक्षा अधिकारी हेमंत पवार यांच्या पथकाने दुसरा छापा उजनी, मीठसाखरे येथे टाकला. येथे अण्णा मसू सापनर आणि ज्ञानेश्वर पाटीलबा वर्पे हे दोघे संशयित पथकाच्या हातावर तुरी देऊन पसार झाले. याबाबत पोलिस ठाण्यात नोंद आहे. मात्र धक्कादायक बाब म्हणजे मोठ्या प्रमाणावर सिन्नर तालुक्यात दूध संकलन केले जाते. विविध राजकीय नेत्यांची संबंधित 478 दूध संकलन संस्था काम करतात. मात्र यातील अवघ्या 14 संस्थांची अधिकृत नोंदणी आहे. 464 संस्था कुठेही नोंदलेल्या नाहीत, अशी धक्कादायक माहिती पुढे आली आहे.

या संदर्भात भाऊसाहेब बैरागी आणि गणेश भाऊ ढवळे यांनी अनधिकृत दूध संकलन व भेसळ याचा पाठपुरावा केला आहे. राज्याच्या अन्न व भेसळ प्रशासन आयुक्तांकडे तक्रार केली आहे. स्थानिक अधिकाऱ्यांनी मात्र याबाबत हालचाल केलेली नाही.

स्थानिक पातळीवर दूध संकलन करणाऱ्या संस्था विविध राजकीय पक्ष आणि नेत्यांशी संबंधित आहेत. या संस्था तसेच प्रक्रिया करणाऱ्या संस्थांच्या संचालकांची अल्पावधीतच प्रचंड भरभराट झाली आहे. त्यामुळे हा नागरिकांच्या आरोग्याशी खेळणाऱ्या व्यवसायाला प्रशासनाचे संरक्षण तर नाही ना? अशी चर्चा सुरू आहे.