Manikrao Kokate : भाजपने घर फोडलं…अखेर मंत्री कोकाटेंना संताप अनावर, बाटलेला पक्ष अन् काय काय म्हणाले?

Nashik News : भाजपची फोडाफोडी अजित पवारांच्या राष्ट्रवादीचे मंत्री माणिकराव कोकाटे यांना चांगलीच जिव्हारी लागली आहे. कोकाटेंचे सख्खे बंधू भारत कोकाटे यांनीही भाजपमध्ये प्रवेश केला आहे. भाजपने कोकाटेंच्या घरातच त्यामाध्यमातून कमळ फुलवलं आहे. कोकाटेंनी अद्याप भाजपच्या या फोडाफोडीवर टीका केली नव्हती. पण सिन्नरमध्ये निवणूक प्रचारसभेत त्यांनी भाजपच्या फोडाफोडीवर संताप व्यक्त केला.

कोकाटे म्हणाले, भाजपने विधानसभा निवडणुकीत माझ्या घरातील व्यक्ती फोडला आता खासदार राजाभाऊ वाजे यांच्या कुटुंबातील व्यक्ती फोडला. भाजप हा पूर्णपणे बाटलेला पक्ष आहे अशी टीका कोकाटेंनी भाजपवर केली. फोडाफोडीत भाजपचे आयुष्य चालले असून, निष्ठावंत कार्यकर्ते मात्र घरी बसले आहेत, असेही कोकाटे म्हणाले.

सिन्नर नगरपरिषद निवडणूक प्रचारार्थ आयोजित जाहीर सभेत कोकाटे बोलत होते. सिन्ररमध्ये महायुती पूर्णपणे फुटली आहे. भाजप, शिवसेना शिंदे गट व राष्ट्रवादी अजित पवार गट तिन्ही पक्षांनी आपआपले उमेदवार दिले आहेत. प्रचाराच्या अंतिम टप्प्यात राष्ट्रवादी अजित पवार पक्षाच्या उमेदवारांच्या प्रचारसभेत मंत्री कोकाटे यांनी भाजपसह शिंदेसेनेला लक्ष्य केलं.

एकनाथ शिंदे यांच्यावर कोकाटेंनी निशाणा साधला.

गेल्या दहा वर्षांपासून आपण सिन्नर नगरपरिषदेचे मुख्याधिकारी बदलण्याची मागणी करत आहोत. नगरविकास खात्याकडून ते झाले नाही, मात्र आता ते सिन्नर दत्तक घ्यायला निघाले आहेत असा आरोप कोकाटे यांनी उपमुख्यमंत्री एकनाथ शिंदे यांचे नाव न घेता केला. सरकारने धोरणात्मक निर्णय घ्यावा, दत्तक घेण्याच्या कोणीही घोषणा करू नये, असेही ते म्हणाले.

प्रत्येक ठिकाणी गेले की लाडकी बहिणी योजनेचे श्रेय लाटतात. लाडकी बहिणी योजनेचे श्रेय कुणी एकाने घेऊ नये, तो सामुदायिक निर्णय आहे. ही योजना युतीच्या तीन्ही घटक पक्षांची आहे. हे विसरुन चालणार नाही. असही कोकाटेंनी नाव न घेता एकनाथ शिंदेंना खडसावलं.

राज्यात नगरपरिषदांच्या निवडणुकांमध्ये महायुतीच्या मित्र पक्षांमध्येच आपसात लढाया आहेत, विरोधी पक्ष केवळ नावालाच आहेत. आज आम्ही एकमेकांच्या विरोधात लढत एकमेकांवर तोंडसुख घेत असलो तरी २ तारखेनंतर पुन्हा एकत्र मांडीला मांडी लावून बसणार आहोत. असं म्हणत त्यांनी सगळं पुन्हा सावरुन घेतलं.